Tinalakay ng Senate Finance Subcommittee B noong Martes, September 30, 2025, ang panukalang 2026 budget ng Movie and Television Review and Classification Board (MTRCB). Sa pagdinig, nagpakita ng suporta ang ilang senador para palakasin ang kapangyarihan ng ahensya sa pag-regulate ng pelikula at telebisyon, lalo na sa harap ng mabilis na pagbabago ng media landscape.

Batay sa National Expenditure Program (NEP) na inihain ng Department of Budget and Management (DBM), nakalaan ang ₱221.297 milyon para sa operasyon ng MTRCB sa Fiscal Year 2026.

Pinangunahan ni Sen. Jinggoy Ejercito Estrada ang deliberasyon at binigyang-diin niya ang kahalagahan ng dagdag na pondo para sa MTRCB. Ayon kay Estrada, dapat suportahan ang ahensya hindi lang sa budget kundi pati sa legislative reforms. Kaya’t itinulak niya ang pagpasa ng Senate Bill No. 878, na naglalayong magtatag ng retained income fund para sa MTRCB. Sa ilalim ng panukala, maaaring mas maayos na mapamahalaan ng board ang revenue collections nito at masigurong may sapat na pondo para sa operational expenses.

Samantala, Sen. Win Gatchalian, chair ng Senate Committee on Finance, ay nagsagawa ng masusing review sa mga programa at proyekto ng MTRCB para sa 2026. Iginiit niya na dapat tiyakin ng ahensya na ang bawat pisong nakalaan sa kanila ay gagamitin nang wasto at may direktang benepisyo sa publiko, partikular sa pagbabantay laban sa hindi angkop na media content.

Nagbigay rin ng matibay na paninindigan si Sen. Robinhood Padilla na dapat saklawin ng MTRCB hindi lang ang pelikula at TV shows kundi pati na rin ang political at commercial advertisements. Aniya, “’Pag MTRCB, lahat ng lalabas sa TV, pelikula, radyo, dapat po talaga dumadaan sa inyo.” Binigyang-diin niya ang pangangailangan ng mas mahigpit na regulasyon sa lahat ng uri ng media upang matiyak ang tamang gabay sa publiko.

Ipinrisenta naman ni MTRCB Chairperson Lala Sotto ang budget proposal ng board, kasama ang mga plano at inisyatibong nais nilang ipatupad para sa susunod na taon. Aminado si Sotto na limitado ang resources ng MTRCB at kailangan nila ng dagdag na suporta para mas epektibong gampanan ang kanilang mandato.

Sa kabuuan, malinaw sa pagdinig na suportado ng Senado ang pagpapalakas ng MTRCB—hindi lamang sa pamamagitan ng pondo kundi pati sa pagpapalawak ng kanilang awtoridad. Layon ng hakbang na ito na mas maprotektahan ang publiko, lalo na ang kabataan, laban sa content na maaaring makasama sa kanilang pananaw at pag-asal.