Nagdaos ng unang pagdinig ang Senate Committee on Public Works noong Martes, September 30, 2025, para talakayin ang mga priority projects ng gobyerno at alamin ang status ng mga natapos at kasalukuyang isinasagawang infrastructure flagship programs.

Pinangunahan ni Sen. Mark Villar, chairperson ng komite, ang pagdinig kung saan dumalo ang mga opisyal mula sa Department of Public Works and Highways (DPWH), Department of Transportation (DOTr), at iba pang ahensya upang ibahagi ang kanilang legislative agenda at mga accomplishment.

Ayon kay Villar, hindi sapat na basta may proyekto lang—dapat ay maayos ang plano, kontekstwalisado, at tugma sa pangangailangan ng mga Pilipino, lalo na’t nakakalat sa iba’t ibang isla ang bansa. Aniya, handa ang komite na makipagtulungan sa national government para matiyak na magiging kapaki-pakinabang at makabuluhan ang mga proyekto.

Samantala, si Sen. Erwin Tulfo, vice chairperson ng komite, ay nagpahayag ng kumpiyansa sa bagong liderato ng DPWH, subalit binalaan na hindi niya palalagpasin ang anumang iregularidad. “Hindi kami pipikit sa anomalies,” ani Tulfo. Dagdag pa niya, sisiyasatin nila ang bawat pahina ng budget, tatanungin ang mga kwestyonableng transaksyon, at ilalantad ang mga sindikatong nakatago sa loob ng public works sector.

Ipinrisenta naman ni DPWH Assistant Secretary Constantine Llanes ang mga priority flagship projects ng ahensya na nagkakahalaga ng ₱2.75 trillion, na bahagi ng mas pinalawak na programa para sa modernisasyon ng infrastructure sa bansa.

Bukod dito, nagbigay rin ng briefing si DOTr Undersecretary Steven Pastor tungkol sa mga nagawa ng ahensya sa road transport at infrastructure, na layong mapahusay ang connectivity at mobility ng mga Pilipino.

Itinuring ang pagdinig na simula ng mas malalim na pagsusuri ng Senado sa mga plano ng gobyerno para sa infrastructure—na may paniniyak na ang mga proyekto ay hindi lamang ambisyoso kundi transparent, responsive, at tunay na may impact sa buhay ng mamamayan.