Pinangunahan ni Senadora Loren Legarda ang Senate Finance Subcommittee H sa budget briefing noong Biyernes, September 19, 2025, para talakayin ang panukalang 2026 budget ng National Commission for Culture and the Arts (NCCA) at ng National Endowment Fund for Culture and the Arts. Ang kabuuang alokasyon para sa dalawang ahensya sa ilalim ng National Expenditure Program ay nasa ₱719.47 million.

Binigyang-diin sa deliberasyon ang malaking papel ng kultura, kasaysayan, at sining sa pagpapalakas ng pambansang identidad at sa pagpapaunlad ng bayan. Iginiit ng mga senador na dapat manatiling sentro ang kultura sa national planning at budgeting dahil sa kakayahan nitong magbigay-inspirasyon, magturo, at magbuklod sa mga Pilipino.

Ipinahayag ni Senadora Legarda na ang kultura at sining ay hindi lamang luho kundi pundasyong haligi ng pagkakaisa, kamalayan, at kaunlaran. Aniya, ang sapat at makatarungang pondo para sa mga cultural institutions ay isang estratehikong investment para sa kinabukasan ng bansa.

Samantala, binigyang-pansin ni Senador Win Gatchalian ang mabagal na disbursement ng pondo ng ilang cultural agencies. Bagama’t 95% ng kanilang pondo ay naobliga na, nasa 69% lamang ang nailabas. Binigyang-diin niya ang pangangailangan ng mas mabilis at epektibong paggamit ng pondo upang masigurong maipatupad ang mga programa at inisyatibang pangkultura nang walang aberya.