Umabot sa 60,312 Alien Employment Permits (AEPs) ang ipinagkaloob ng Department of Labor and Employment (DOLE) sa mga dayuhang manggagawa noong 2024, bilang tugon sa pangangailangan para sa mga espesyalisadong kasanayan habang pinangangalagaan ang kapakanan ng mga lokal na manggagawa.

Ayon kay DOLE Bureau of Local Employment (BLE) Director Patrick Patriwirawan Jr., karamihan sa mga permit na ito ay para sa mga trabahong nangangailangan ng mataas na teknikal na kasanayan, tulad ng cloud computing specialists, cybersecurity analysts, at network engineers—mga posisyong mahirap mapunan dahil sa kakulangan ng kwalipikadong lokal na manggagawa.

Bukod pa rito, sakop din ng mga AEP ang managerial at consultancy roles, depende sa mga panukala ng mga employer.

Bilang tugon sa mga pangamba ukol sa kompetisyon sa trabaho, ipinatutupad ng DOLE ang mas mahigpit na alituntunin para sa pagkuha ng dayuhang manggagawa.

Kabilang din dito ang economic needs test na kailangang ipasa ng mga kumpanya upang patunayan ang pangangailangan sa pagkuha ng dayuhan, at ang pagkakaroon ng understudy training program upang maipasa ang kasanayan sa mga Pilipino.

Ani Patriwirawan, ang mga hakbang na ito ay alinsunod sa direktiba ni Pangulong Ferdinand “Bongbong” Marcos Jr. na tiyaking protektado ang lokal na manggagawa habang sinusuportahan ang pagpasok ng dayuhang ekspertong makatutulong sa pambansang kaunlaran.

Gayundin, tiniyak niya na patuloy na magbabantay ang DOLE sa pagsunod sa mga batas-paggawa, lalo na sa mga sektor tulad ng konstruksyon at hospitality, kung saan may mga ulat ng dominasyon ng mga dayuhang manggagawa.

Larawan mula sa Pinoy Peryodiko.