Malaking hakbang ang ginawa ng Philippine Health Insurance Corporation (PhilHealth) para mapalawak ang access sa healthcare sa pamamagitan ng pagsasama ng outpatient emergency services sa mga accredited na Level 1, 2, at 3 hospitals sa buong bansa. Simula Pebrero 14, 2025, mas magiging abot-kamay na ang kritikal na emergency care para sa mga Filipino nang walang malaking gastos.

Sa ilalim ng bagong facility-based emergency (FBE) benefit, sakop na ng PhilHealth ang mga essential outpatient emergency services tulad ng mga serbisyong ibinibigay sa emergency departments ng mga ospital. Bahagi ito ng outpatient emergency care benefit package na naglalayong magbigay ng komprehensibong suporta para sa mga urgent medical needs na hindi nangangailangan ng hospital admission. Hindi na kailangang mag-apply ng hiwalay na accreditation ang mga ospital para magbigay ng FBE benefits dahil kasama na ito sa kanilang existing accreditation. Pero ang mga extension facility na nag-ooffer ng FBE services ay kailangang magsumite ng certification sa pinakamalapit na PhilHealth regional office para ma-update ang kanilang records.

Ang desisyon ng PhilHealth na palawakin ang coverage ay tugon sa mga hamon sa access sa healthcare. Binigyang-diin ni Pangulong Ferdinand Marcos Jr. ang kahalagahan ng tuloy-tuloy na paghahatid ng PhilHealth benefits, lalo na’t tinanggal ang government subsidy para sa ahensya sa 2025 national budget. Inaasahang milyon-milyong Filipino ang makikinabang dito, lalo na ang mga umaasa sa public health services.

Bukod sa outpatient emergency care, plano rin ng PhilHealth na isama ang coverage para sa ambulance services sa ilalim ng pre-hospital emergency benefit. Mas mapapalakas nito ang emergency response system ng bansa, at mas matitiyak na mabilis na maaaksyunan ang mga pasyente mula sa oras na kailangan nila ng tulong.

Para sa mga negosyante at business owners, mahalagang maging updated sa mga ganitong polisiya sa healthcare dahil maaapektuhan nito ang mga empleyado at kanilang pamilya. Sa pag-unawa sa mga pagbabagong ito, mas magiging handa ang mga negosyo na suportahan ang kanilang workforce at makatulong sa pagbuo ng mas malusog at produktibong lipunan. Ang pinalawak na coverage ng PhilHealth ay hindi lamang tagumpay para sa public health — ito ay hakbang tungo sa mas matatag na bansa.

(Larawan: PILIPINO Mirror)