NOBYEMBRE 21, 2025 — Naibigay na ng Department of Transportation (DOTr) ang kontrata para sa isa sa pinakamahalagang bahagi ng Metro Manila Subway Project (MMSP), matapos igawad ang Contract Package (CP) 105 sa tambalang D.M. Consunji Inc. (DMCI) at Nishimatsu Construction Co. Ltd.

Batay sa dokumentong inilabas ng DOTr noong Oktubre 29, nakatakdang bayaran ang joint venture ng ₱21.73 bilyon, hiwalay pa sa 12 porsyentong value-added tax. Ang abiso ay ipinadala kay Keiji Matsushita, kinatawan ng DMCI-Nishimatsu, na inatasang magsumite ng performance security sa loob ng 28 araw bago tuluyang simulan ang proyekto.

Ang CP 105 ay sumasaklaw sa imprastraktura ng subway sa Taguig City: isang 0.66-kilometrong tunnel, istasyon sa Kalayaan Avenue na may habang 242.2 metro, at istasyon sa Bonifacio Global City na may sukat na 436.05 metro. Ayon sa ulat ng DMCI sa mga mamumuhunan, inaasahang tatagal ng 67 buwan o mahigit anim na taon ang konstruksyon.

Ito ang unang kontratang na-award mula pa noong 2022, dahilan kung bakit naantala ng tatlong taon ang kabuuang schedule ng subway. Sa kabila nito, nananatiling target ng DOTr na matapos ang buong proyekto sa 2032, matapos maurong mula sa orihinal na planong partial operation sa 2028.

Dalawa pang kontrata ang nakabinbin: CP 108 (Lawton hanggang Senado) at CP 109 (airport line). Layunin ng ahensya na maibigay ang lahat ng kontrata ngayong taon upang makasunod sa bagong deadline.

Para sa DMCI-Nishimatsu, ito na ang ikalawang panalo sa MMSP matapos masungkit ang CP 102 (East Avenue–Quezon Avenue segment) noong 2022.

Ang MMSP ang kauna-unahang underground rail system ng bansa, na may habang 33 kilometro at may 17 istasyon mula Valenzuela City hanggang Ninoy Aquino International Airport. Kapag natapos, inaasahang bababa sa 35 minuto ang biyahe mula dulo hanggang dulo.

Sa kabila ng mga pagkaantala, inaasahan pa rin ng pamahalaan na ang subway ang magiging sagot sa matinding trapiko sa Metro Manila.

(Larawan: Wikipedia)