DISYEMBRE 5, 2025 — Sa gitna ng tumitinding banta ng online scams, nagsanib-puwersa ang Globe Telecom Inc. at Bank of the Philippine Islands (BPI) upang subukan ang isang makabagong sistema ng beripikasyon na layong palakasin ang seguridad sa digital banking.

Ang proyekto ay nakapaloob sa Proof of Concept para sa Silent Network Authentication (SNA), bahagi ng inisyatibong G Verify ng Globe. Ang teknolohiyang ito ay gumagamit ng real-time network intelligence at secure APIs upang agad makilala ang gumagamit ng isang device, nang hindi na kailangan ng karagdagang code o SMS.

Ayon sa Globe, matagumpay nang naisagawa ang teknikal na pagsusuri ng SNA. Sa pamamagitan ng integrasyon sa Network Exposure Platform (NEP) ng telco, nakapag-interface ang test application ng BPI at nakapagbigay ng real-time authentication na direktang kumukumpirma sa identidad ng gumagamit.

Binibigyang-diin ng Globe na ang SNA ay idinisenyo upang bawasan ang panganib mula sa mga panlolokong gumagamit ng One-Time Passwords (OTPs), habang pinapadali ang karanasan ng kliyente.

“Security and simplicity should always go together,” pahayag ni KD Dizon, vice president at head ng Globe Business. 

(Ang seguridad at kasimplehan ay dapat laging magkasama.)

Ipinaliwanag ni Dizon na ang pakikipagtulungan sa BPI ay mahalaga upang masuri ang SNA sa aktuwal na kapaligiran ng pagbabangko, na nagbibigay ng kumpiyansa sa mga Pilipino na makipagtransaksyon nang ligtas.

Samantala, iginiit ni Alex Seminiano, chief technology officer ng BPI, na sentro ng kanilang disenyo ang proteksyon ng kliyente. “Through this POC, we are testing an advanced authentication approach that fortifies security while staying completely frictionless. This shows our commitment to ensuring clients are at the center of what we do,” aniya. 

(Sa pamamagitan ng POC na ito, sinusubukan namin ang isang makabagong paraan ng beripikasyon na nagpapalakas ng seguridad habang nananatiling walang sagabal. Ipinapakita nito ang aming dedikasyon na ilagay ang mga kliyente sa sentro ng aming ginagawa.)

Ang Globe at BPI ay naglatag ng bagong pamantayan sa digital security. Kung magiging matagumpay ang pilot test, posibleng mabago nito ang paraan ng beripikasyon sa online banking sa bansa — isang hakbang na maaaring magbigay ng mas matibay na proteksyon laban sa lumalalang digital fraud.

(Larawan: Philippine News Agency)