MANILA — Naghain ng panukalang batas sa Senado si Senador Erwin Tulfo na naglalayong bawasan ang value-added tax (VAT) mula sa kasalukuyang 12 porsyento tungo sa 10 porsyento, upang maibsan ang pasanin ng mga mamimili at pasiglahin ang ekonomiya.

Sa ilalim ng Senate Bill No. 1552 o “VAT Reduction Act of 2025,” iminungkahi ang pagbabago sa ilang probisyon ng National Internal Revenue Code of 1997 upang ipatupad ang mas mababang VAT rate sa buong bansa. “The purpose of this Act is to provide relief to Filipino consumers and businesses by reducing the VAT rate from 12% to 10%,” ayon sa explanatory note ng panukala.

Gayunpaman, nagbabala ang Department of Finance (DOF) na maaaring magdulot ng malaking epekto sa kita ng pamahalaan ang naturang hakbang. Ayon kay Finance Secretary Ralph Recto, “Lowering the VAT rate from 12% to 10% may sound attractive, but the Department of Finance cautions that it could greatly affect government revenues, fiscal stability, and economic fairness.”

Tinatayang aabot sa P330 bilyon kada taon ang mawawala sa kita ng gobyerno kung maisasabatas ang panukala. Dagdag pa ni Recto, “If we have a target of 5.5 percent fiscal deficit this year, with the reduction of VAT to 10 percent, our fiscal deficit will be at 6.5 percent.”

Samantala, naghain din sa Kamara si Batangas 1st District Rep. Leandro Legarda Leviste ng House Bill No. 4302 na may kaparehong layunin. Aniya, dapat gawing pangunahing tax measure ng Kongreso ang pagbawas ng VAT upang maibsan ang pasanin ng mga mamamayan.

Sa kasalukuyan, nakabinbin pa ang Senate Bill No. 1552 sa komite at isasailalim sa deliberasyon. Kung maisasabatas, ito ang magiging kauna-unahang pagbaba ng VAT rate mula nang ipatupad ang 12 porsyento noong 2006.