NOBYEMBRE 23, 2025 — Sa isang hakbang na nagbigay ng bagong sigla sa makasaysayang mundo ng panitikan sa Maynila, binili ni Batangas 1st District Rep. Leandro Legarda Leviste ang Solidaridad Bookshop — ang tanyag na tindahan ng aklat na itinatag ng Pambansang Alagad ng Sining sa Panitikan na si F. Sionil Jose noong 1965.

Matatagpuan sa Padre Faura, ang Solidaridad ay matagal nang naging pugad ng mga manunulat, iskolar, at mga personalidad sa kultura. Kilala ito bilang tahanan ng pinakamalawak na koleksiyon ng Filipiniana at sentro ng PEN Philippines, na itinatag ni Jose noong 1958. Sa loob ng mga dekada, dito nagtipon ang mga lokal at internasyonal na haligi ng sining at panitikan.

Sa kanyang pahayag, pinasalamatan ni Leviste ang pamilya Jose sa pagtitiwala.

“We thank the Jose family for entrusting us with Solidaridad. We hope they can remain involved and help ensure that the bookshop’s operations stay true to its history and the legacy of F. Sionil Jose,” aniya.

(Nagpapasalamat kami sa pamilya Jose sa pagtitiwala sa amin sa Solidaridad. Umaasa kaming mananatili silang kasangkot upang matiyak na ang operasyon ng bookshop ay mananatiling tapat sa kasaysayan at pamana ni F. Sionil Jose.)

Matapos pumanaw sina F. Sionil at Teresita Jovellanos Jose noong 2022, pinamahalaan ng kanilang panganay na anak na si Tonet Jose ang tindahan. 

Sa paglipat ng pagmamay-ari, nagpahayag siya ng suporta.

“Our family will always cherish the memory of Solidaridad and the work our parents put into it. We are excited about the transition to the new ownership and wish them success as they continue the legacy of F. Sionil Jose,” aniya.

(Palaging iingatan ng aming pamilya ang alaala ng Solidaridad at ang gawaing iniwan ng aming mga magulang. Nasasabik kami sa paglipat ng pamamahala at hangad naming magtagumpay sila sa pagpapatuloy ng pamana ni F. Sionil Jose.)

Sa pagbili ni Leviste, tiniyak niyang mananatiling buhay ang “Asia’s biggest little bookshop” — isang institusyong hindi lamang nagbebenta ng aklat, kundi nagtataguyod ng identidad at alaala ng panitikang Pilipino.

(Larawan: Solidaridad Bookshop | Facebook)