NOBYEMBRE 25, 2025 — Nagpatupad ng biglaang suspensyon ang Department of Finance (DOF) sa lahat ng field tax audit ng Bureau of Internal Revenue (BIR) matapos dumagsa ang reklamo ng mga negosyante hinggil sa umano’y pang-aabuso sa paggamit ng Letters of Authority (LOA) at Mission Orders (MO). Kasabay nito, naghahanda ang Senado na imbestigahan ang tinaguriang “LOA scheme” na sinasabing naging ugat ng panggigipit sa mga nagbabayad ng buwis.

Sa ilalim ng Revenue Memorandum Circular No. 107-2025, ipinag-utos ni Finance Secretary Frederick D. Go ang agarang pagtigil sa pag-isyu, pag-print, at pag-serve ng LOA at MO na siyang ginagamit ng mga tax examiner para magsagawa ng audit.

“This is in response to the concerns raised by the taxpayers regarding the issuance of Letters of Authority and Mission Orders,” pahayag ni Go. 

(Ito ay tugon sa mga pangamba ng mga nagbabayad ng buwis hinggil sa pag-isyu ng Letters of Authority at Mission Orders.)

Dagdag pa niya, “The people deserve better.” 

(Mas nararapat ang taumbayan sa mas maayos na sistema.)

Ayon naman kay BIR Commissioner Charlito Martin R. Mendoza, saklaw ng suspensyon ang lahat ng yunit ng ahensya — mula sa Large Taxpayers Service, Revenue Regions, District Offices, Assessment Divisions, hanggang sa mga espesyal na audit unit. 

Gayunman, may mga eksepsiyon para sa mga kasong itinuturing na agarang kailangan o legal na obligadong ipagpatuloy, gaya ng criminal investigations, audits na malapit nang mag-expire, refund claims, one-time transactions tulad ng estate tax, at mga kasong may validated intelligence reports.

Upang ayusin ang proseso, bumuo si Mendoza ng Technical Working Group na magsusuri sa mga kahinaan ng sistema at magrerekomenda ng bagong pamantayan. Layunin ng grupo na gawing “predictable, evidence-based, technology-driven, and fair” ang audit system, alinsunod sa direktiba ni Pangulong Ferdinand R. Marcos Jr. para sa mas malinaw at episyenteng koleksiyon ng buwis.

Habang isinasagawa ang reporma sa loob ng BIR, lumalakas naman ang panawagan sa Senado para busisiin ang umano’y “raket” sa likod ng LOA. Sa inihaing Senate Resolution No. 180, iginiit ni Senador Erwin Tulfo na dapat aksyunan ng Blue Ribbon Committee ang mga reklamo ng maliliit at malalaking negosyo.

“While we are busy investigating the flood control mess, there is corruption thriving in the BIR,” ani Tulfo. 

(Habang abala tayo sa imbestigasyon sa flood control mess, may korapsyon na namamayagpag sa BIR.)

Binanggit pa niya, “That’s why I said during the plenary debates of the agency that they are second among the most corrupt agencies, following the Department of Public Works and Highways (DPWH).” 

(Kaya nga sinabi ko sa plenary debates na pangalawa sila sa pinaka-corrupt na ahensya, kasunod ng Department of Public Works and Highways.)

Plano ni Tulfo na ipatawag ang mga tauhan ng BIR, mula sa examiners hanggang sa regional directors, pati na rin ang dating commissioner na si Romeo Lumagui. Nanawagan din siya ng reshuffle sa hanay ng mga opisyal upang matigil ang umano’y sabwatan.

“This is too much! Even though the business owners are paying their taxes, they will still be given an LOA, like a search warrant into their business records,” giit ni Tulfo. 

(Sobra na ito! Kahit nagbabayad ng buwis ang mga negosyante, binibigyan pa rin sila ng LOA, na parang search warrant sa kanilang mga rekord.)

Samantala, nagbabala si Senador JV Ejercito laban sa “weaponization” ng LOA na aniya’y nagdudulot ng pangamba sa mga dayuhang mamumuhunan. 

“If not carefully regulated, [this] may create an atmosphere of uncertainty among businesses and discourage investors who may perceive it as a sign of unpredictability or overreach in tax administration,” wika niya. 

(Kung hindi maingat na maregula, ito ay maaaring magdulot ng kawalan ng katiyakan sa mga negosyo at panghihina ng loob ng mga mamumuhunan na makikita ito bilang tanda ng hindi maaasahan o sobra-sobrang panghihimasok sa tax administration.)

Sa kabuuan, ang sabayang aksyon ng DOF at BIR na suspindihin ang lahat ng audit, at ang imbestigasyon ng Senado, ay nagpapakita ng malalim na krisis sa pamamalakad ng buwis sa bansa. Habang pinipilit ng pamahalaan na ibalik ang tiwala ng publiko, nananatiling hamon ang pagtiyak na ang koleksiyon ng buwis ay magiging patas, malinaw, at walang bahid ng pang-aabuso.

(Larawan: Philippine News Agency)