USA – Isang koalisyon ng mga unyon, employer at relihiyosong grupo ang nagsampa ng kaso laban sa administrasyon ni dating U.S. President Donald Trump upang ipahinto ang ipinatutupad nitong $100,000 karagdagang bayarin para sa mga H-1B worker visas.

Ayon sa reklamo na inihain sa federal court sa San Francisco, lumalabag umano ang bagong panuntunan dahil wala umanong kapangyarihan ang pangulo na baguhin ang nakasaad sa batas na sumasaklaw sa H-1B visa program. Iginiit din ng mga nagpetisyon na hindi dumaan sa tamang proseso ng rulemaking ang panukala at maaari itong magdulot ng selective enforcement at katiwalian.

Sa ilalim ng naturang patakaran, hindi papayagang makapasok sa Estados Unidos ang mga bagong tatanggap ng H-1B visa hangga’t hindi nagbabayad ang kanilang employer ng karagdagang $100,000. Hindi saklaw ng panuntunan ang mga may hawak na ng H-1B visa at ang mga nakapagsumite na ng aplikasyon bago ang itinakdang petsa.

Kasalukuyang nagbabayad ang mga employer ng humigit-kumulang $2,000 hanggang $5,000 depende sa laki ng kumpanya at iba pang kondisyon.

Depensa naman ng kampo ni Trump, layon ng mataas na bayarin na pigilan ang umano’y “spamming” ng sistema, protektahan ang sahod ng mga Amerikanong manggagawa, at magbigay ng katiyakan sa mga employer.

Subalit iginiit ng mga nagpetisyon na ang ipinatutupad na singil ay hindi makatwiran at magdudulot ng mabigat na pasanin sa mga kumpanyang umaasa sa mga dayuhang propesyonal, partikular sa sektor ng teknolohiya, unibersidad at pananaliksik.

Inaasahang magbibigay ng desisyon ang korte sa mga susunod na linggo habang patuloy ang pagtalakay kung ligal nga bang ipataw ng dating administrasyon ang nasabing malaking dagdag-bayarin sa visa program.