Oktubre 8, 2025 – Plano ng pamahalaan ng Denmark na ipagbawal ang paggamit ng social media sa mga batang wala pang 15 taong gulang bilang bahagi ng hakbang upang protektahan ang kalusugang pangkaisipan at kapakanan ng kabataan.

Ayon kay Prime Minister Mette Frederiksen, napagpasyahan ng gobyerno na ihain ang panukalang batas matapos mapansin ang pagtaas ng kaso ng depresyon, anxiety, at kakulangan sa konsentrasyon sa mga kabataang labis na naaapektuhan ng paggamit ng social media.

Sa kaniyang pahayag, iginiit ni Frederiksen na “ninanakaw ng social media ang pagkabata ng ating mga anak,” at panahon na umano upang ibalik ang balanse sa pagitan ng teknolohiya at tunay na pakikisalamuha.

Batay sa panukala, mahigpit na ipagbabawal ang pagbubukas o paggamit ng mga social media account ng mga batang mas bata sa 15 taong gulang, maliban kung may pahintulot mula sa mga magulang para sa mga edad 13 hanggang 14.

Hindi pa malinaw kung anong mga platform ang saklaw ng pagbabawal at kung paano ito ipatutupad ng mga awtoridad. Inaasahang pag-aaralan ng gobyerno ang mga teknikal na paraan ng age verification at posibleng parusa sa mga lalabag.

Ang naturang panukala ay kasunod ng naunang polisiya ng Denmark na nagbawal ng paggamit ng cellphone sa mga paaralan at after-school programs upang mapabuti ang focus at social interaction ng mga estudyante.

Kabilang na ngayon ang Denmark sa mga bansang nangunguna sa Europa sa pagsusulong ng mas mahigpit na regulasyon sa social media para sa mga kabataan. Katulad ng mga panukala sa ibang bansa gaya ng Australia at France, layon nitong bawasan ang masamang epekto ng labis na exposure ng mga bata sa internet.

Bagaman suportado ng ilan ang hakbang, may mga kritiko namang nagpahayag ng pag-aalala sa karapatan sa kalayaan sa pagpapahayag at sa posibleng limitasyon ng access ng kabataan sa impormasyon at komunikasyon.

Patuloy na isinasapinal ng Danish Parliament ang mga detalye ng panukala bago ito isalang sa deliberasyon sa mga susunod na linggo.