TOKYO — Inamin ni Japanese Prime Minister Sanae Takaichi na karaniwang dalawang hanggang apat na oras lamang ang kanyang tulog bawat gabi, isang pahayag na muling nagpasiklab ng diskusyon ukol sa kultura ng labis na pagtatrabaho sa Japan.

Sa isang pagdinig sa legislative committee, sinabi ni Takaichi: “I sleep about two hours now, four hours at the longest. I feel it’s bad for my skin.” Ang pahayag ay kasunod ng kontrobersyal na 3 a.m. staff meeting na kanyang ipinatawag upang paghandaan ang sesyon sa parliyamento.

Ang kanyang pag-amin ay umani ng batikos mula sa mga kritiko na nagsasabing tila pinapalakas nito ang ideya ng “karoshi” — isang Japanese term na tumutukoy sa pagkamatay dahil sa labis na trabaho. Sa kabila nito, ipinagtanggol ni Takaichi ang kanyang mga hakbang, at sinabing mahalaga ang balanse sa pagitan ng trabaho, pangangalaga sa pamilya, at pahinga.

Si Takaichi, ang kauna-unahang babaeng punong ministro ng Japan, ay kilala sa kanyang masigasig na estilo ng pamumuno. Gayunman, ang kanyang mga desisyon gaya ng pagpupulong sa madaling araw ay nagdulot ng pangamba sa kalusugan ng mga kawani ng gobyerno.

Patuloy ang mga panawagan mula sa mga labor groups at health advocates na paigtingin ang mga polisiya para sa mas maayos na work-life balance sa Japan, isang bansang matagal nang kinikilala sa mahigpit na kultura ng trabaho.