MANILA — Umani ng papuri at mabilis na nag-viral sa social media ang birthday post ng Kapamilya actress-singer na si Maris Racal, matapos niyang ipahayag ang kanyang ika-28 kaarawan sa pamamagitan ng makabuluhang mensahe para sa bayan.

Sa halip na tradisyunal na birthday wish, ibinahagi ni Racal ang kanyang larawan kalakip ang maikling pahayag:

“Ang wish ko lang ay DPWH.”
(Di Pwede ang Walang Hustisya).

Agad itong umani ng libo-libong reaksyon at komento mula sa mga netizen na humanga sa tapang at malasakit ni Racal na gamitin ang kanyang espesyal na araw para magsalita laban sa kawalan ng hustisya.

Matatandaang isang araw bago ang kanyang kaarawan, dumalo si Racal sa “Trillion Peso March” sa Luneta — isang kilos-protesta laban sa umano’y malawakang korapsyon sa mga proyektong pang-imprastraktura at flood-control ng pamahalaan. Sa kanyang rally post, idiniin niya: “Serbisyo sa tao, huwag gawing negosyo.”

Hindi nag-iisa si Racal sa panawagang ito. Kasama niyang nakilahok sa protesta ang ilang kilalang personalidad tulad nina Vice Ganda, Donny Pangilinan, Anne Curtis, Nadine Lustre, Andrea Brillantes, Elijah Canlas, Iza Calzado, Catriona Gray, Nicole Cordoves, at marami pang iba.

Para sa marami, ang pahayag ni Racal ay malinaw na senyales ng paglakas ng boses ng mga artista sa usaping panlipunan at pampulitika. Itinuturing itong salamin ng lumalalim na pagkadismaya ng publiko sa katiwalian at sabay na panawagan para sa tunay na hustisya at pananagutan sa pamahalaan.

Sa kanyang kakaibang birthday wish, ipinakita ni Maris Racal na ang pagdiriwang ay maaari ring maging plataporma ng pagkakaisa at paninindigan para sa bayan. (Larawan: Maris Racal / Fb)