MANILA — Isa na namang emosyonal na tagpo ang tumatak sa mga manonood ng FPJ’s Batang Quiapo matapos pumanaw ang karakter ni Oweng, na ginagampanan ni Baby Giant, sa episode na ipinalabas nitong Setyembre 26. Ayon sa ABS-CBN Entertainment, si Oweng ay binaril ng karakter ni Lucio (Ronnie Lazaro), sa kabila ng kanilang kasunduan.

Sa isang eksena na umantig sa damdamin ng mga tagasubaybay, hindi tumupad si Lucio sa usapan at itinuloy ang pamamaril kay Oweng. “Nalagasan ang tropa,” ayon sa opisyal na TikTok post ng ABS-CBN PR, na nagbahagi ng eksena kung saan tuluyang bumagsak si Oweng matapos ang pamamaril.

Si Oweng ay kilalang kaibigan ni Tanggol (Coco Martin) sa serye, at bahagi ng core group na tumutulong sa mga misyon ng bida. Ang kanyang pagpanaw ay nagdulot ng matinding lungkot sa mga karakter sa palabas, lalo na kay Baby Giant, na makikita sa behind-the-scenes footage na naiyak sa kanyang huling araw sa set.

Hindi pa malinaw kung tuluyang mawawala ang karakter ni Oweng sa kwento, ngunit ayon sa mga tagasubaybay, ang kanyang pagpanaw ay maaaring magbukas ng bagong yugto sa buhay ni Tanggol at sa mga susunod na laban ng grupo.

Ang FPJ’s Batang Quiapo ay napapanood gabi-gabi sa Kapamilya Channel, A2Z, TV5, Kapamilya Online Live, iWantTFC, at iba pang ABS-CBN platforms. Patuloy itong tinatangkilik ng milyon-milyong Pilipino sa loob at labas ng bansa.

Larawan mula sa Mr. Coco Martin