Disyembre 1, 2025 – Humakot ng atensyon at engrandeng tagumpay ang pelikulang Uninvited matapos itong mag-uwi ng pitong tropeyo sa 41st Star Awards for Movies ng Philippine Movie Press Club (PMPC) na ginanap sa Makabagong San Juan Theater, San Juan City nitong Linggo, November 30, 2025. Tampok sa gabing iyon ang pagbabalik ningning ng Star For All Seasons na si Vilma Santos, na muling pinatunayan kung bakit siya reyna ng industriya matapos tanghaling Movie Actress of the Year para sa kanyang matapang at de-kalibreng performance sa naturang pelikula. Kasabay niyang nagningning ang kapwa bida na si Aga Muhlach, na kinilala bilang Movie Actor of the Year para rin sa Uninvited—isang parangal na mas lalo pang naging malaking usapan nang lumabas na ka-tie niya para sa nasabing kategorya ang Kapuso Drama King na si Dennis Trillo para sa pelikulang Green Bones.

Nagwagi rin ang Uninvited bilang Movie of the Year, habang si Dan Villegas naman ang itinanghal na Movie Director of the Year, muling pinapatunayan ang kakaibang husay niya sa pagbuo ng kuwento at emosyon. Tuloy-tuloy ang panalo ng pelikula matapos masungkit ang Movie Cinematographer of the Year para kay Pao Orendain, Movie Production Designer of the Year para kay Mic Tatad King, at ang prestihiyosong Movie Ensemble Acting of the Year na nagpapatunay sa solidong chemistry at powerhouse acting ng buong cast.

Samantala, hindi rin nagpahuli ang ibang productions ngayong taon. Si Sunshine Cruz ang wagi bilang Movie Supporting Actress of the Year para sa Lola Magdalena, habang si Harvey Bautista naman ang kinilalang Movie Supporting Actor of the Year para sa Pushcart Tales. Bago rin ang henerasyon ng mga rising star nang tanghaling Kaila Estrada bilang New Movie Actress of the Year para sa Un/Happy For You, habang Will Ashley ang tumanggap ng New Movie Actor of the Year para sa Balota.

Para naman sa kabataan sa industriya, kinilala ang galing ni Ryrie Sophia bilang Movie Child Performer of the Year sa kanyang pagganap sa Mujigae. Nag-uwi rin ng mga tropeyo ang Green Bones bukod sa tagumpay ni Dennis Trillo—panalo ito bilang Movie Screenwriter of the Year para kina Ricky Lee at Anj Atienza, pati na rin Movie Editor of the Year para kay Benjamin Tolentino.

Hindi rin nagpahuli ang malalaking pangalan sa takilya dahil muling kinilala sina Alden Richards at Kathryn Bernardo bilang Takilya King and Queen matapos ang napakalakas na box-office performance ng pelikula nilang Hello, Love, Again. Patunay ito na kahit ilang taon na ang loveteam pairing nila, solid pa rin ang suporta ng publiko.

Pinangunahan nina Gladys Reyes, Marlo Mortel, at Miss Grand International 2024 CJ Opiaza ang hosting duties, na nagbigay aliw, energy, at star power sa buong event. Sa kabuuan, ang 41st Star Awards for Movies ay naging gabi ng selebrasyon, pagbabalik-ningning ng mga beterano, at pagsibol ng mga bagong bituin—isang patunay na buhay na buhay ang industriya ng pelikulang Pilipino at mas nagiging matapang sa paglikha ng mga kuwentong may puso, kalidad, at impact sa manonood.

Larawan: Pmpc Star Awards 2025