Disyembre 14, 2025 – Nilinaw ng personal assistant ni Jinkee Pacquiao na si Malou Masangkay ang umuugong na isyu sa social media na umano’y hindi sinuportahan ni Manny “Pacman” Pacquiao ang kanyang anak na si Eman Bacosa.

Sa isang post na ibinahagi kamakailan, iginiit ni Malou—na matagal nang personal assistant ni Jinkee—na isa siya sa mga mismong nakasaksi kung paanong buong-buo ang naging suporta ng mag-asawang Pacquiao kay Eman, lalo na noong mga panahong nangangailangan ito ng gabay at tulong.

Ayon kay Malou, hindi raw mabilang ang tulong na ibinigay nina Manny at Jinkee kay Eman, mula sa personal na pangangailangan hanggang sa simpleng pagpaparamdam ng malasakit.

 “Isa ako sa mga nakasaksi kung gaano kasobra ang tulong nina Sir Manny at Madam Jinkee kay Eman. Mula sa pamimili ng damit at sapatos hanggang sa personal na pag-aasikaso, nandoon sila,” ani Malou sa kanyang post.

Dagdag pa niya, hindi kailanman pinabayaan ng Pambansang Kamao ang kanyang anak at hindi rin umano kailangang ipangalandakan pa sa social media ang lahat ng tulong na ibinigay.

“Hindi lahat kailangang ipost. Hindi ibig sabihin na tahimik sila ay wala silang ginagawa,” giit pa niya.

Diretso ring mensahe ang iniwan ni Malou para kay Eman, na aniya’y alam naman sa sariling puso kung gaano siya kamahal ng kanyang ama.

 “Alam mo kung gaano ka kamahal ng daddy mo. Mahal na mahal ka niya—alam mo ‘yan.”

Kalakip ng naturang post ang isang larawan kung saan makikitang ipinag-shopping sina Eman ng mag-asawang Dra. Vicki Belo at Dr. Hayden Kho, na naging mitsa ng espekulasyon online na tila ba mas suportado pa raw si Eman ng iba kaysa ng sariling ama.

Gayunman, mabilis namang dumipensa ang mga netizen, na nagsabing wala ni minsan ay nagsalita si Eman laban sa kanyang ama o kay Jinkee Pacquiao sa alinman sa kanyang mga panayam.

Marami rin ang nagpunto na natural lamang na tumanggap ng tulong si Eman mula sa ibang taong bukal ang loob, at hindi ito nangangahulugang kulang ang suporta mula sa kanyang pamilya.

Sa mga nakalipas na araw, lalong naging sentro ng atensyon si Eman matapos siyang pormal na ipakilala bilang bagong Sparkle artist, makadaupang-palad ang kanyang celebrity crush na si Jillian Ward, at makasama pa ang sinasabing kamukha niyang si Piolo Pascual—mga pangyayaring lalo pang nagpasiklab sa interes ng publiko sa kanyang buhay at karera.

Sa huli, iginiit ng mga tagasuporta ni Eman na ang tunay na kwento ay alam lamang ng mga taong direktang sangkot, at hindi ng mga netizen na mabilis humusga batay sa iilang clips at posts online.