Inanunsyo ni Atty. JM Carait ang kanyang kandidatura bilang bise gobernador ng Laguna, dala ang hangaring maglingkod sa mamamayan sa pamamagitan ng mga programang nakatuon sa hustisya at karapatang pantao.

Bilang isang beteranong abogado, itinataguyod ni Atty. Carait ang pagbibigay ng libreng serbisyong legal at payong pangbatas sa mga kababayang walang kakayahang magbayad para sa mga ganitong serbisyo. “Maraming Pilipino ang nahihirapang ipaglaban ang kanilang mga karapatan dahil sa kawalan ng pondo. Gusto kong baguhin iyon sa Laguna,” aniya.

Ayon kay Atty. Carait, layunin ng kanyang plataporma na gawing abot-kamay ang hustisya sa lahat ng sektor, lalo na sa mga mahihirap at inaaping indibidwal. Suportado niya ang pagtatayo ng legal aid centers sa bawat bayan at lungsod sa Laguna, na magsisilbing kanlungan ng mga nangangailangan ng agarang tulong pang-legal.

Bukod dito, adbokasiya din niya ng legal literacy upang maturuan ang mga mamamayan kung paano ipagtanggol ang kanilang sarili sa harap ng batas. "Ang kaalaman sa batas ay hindi lamang para sa mga abogado; ito'y dapat maging karapatan ng bawat isa," dagdag niya.

Sa kabila ng kanyang pagiging abala bilang abogado, aktibo rin si Atty. Carait sa pagdalo sa mga barangay forum at konsultasyon upang marinig ang mga hinaing ng karaniwang mamamayan. Sinisiguro niyang ang kanilang mga boses ay magiging gabay sa kanyang mga plano bilang lingkod-bayan.

Ang kanyang kandidatura ay pinuri ng iba’t ibang sektor, na sinasabing ang kanyang malasakit sa legal na kapakanan ng mga tao ay mahalaga para sa isang mas makatarungan at progresibong Laguna.

"Ang hustisya ay dapat pantay-pantay, at ang bise gobernador ay dapat na maging tagapagtanggol ng lahat, hindi lamang ng mga may kakayahang magbayad," pahayag ni Carait sa kanyang paglulunsad ng kampanya.

Patuloy niyang nililibot ang Laguna upang ipahayag ang kanyang mga adbokasiya at makuha ang tiwala ng kanyang mga kababayan.