OKTUBRE 3, 2025 – Sa gitna ng pagtutok ng pamahalaan sa pagtulong sa mga nasalanta ng Bagyong Opong sa Masbate, binigyang-diin ni Pangulong Ferdinand Marcos Jr. na ang pangunahing tungkulin ng mga halal na opisyal ay ang tunay na pagseserbisyo sa taumbayan at hindi ang pamumulitika.

Personal na nagtungo ang Pangulo sa Masbate nitong Miyerkules upang alamin ang kalagayan ng mga pamilyang matinding naapektuhan ng kalamidad. Sa kanyang pahayag, mariin niyang ipinunto na panahon ng pagtutulungan at malasakit ang kailangan, lalo na sa mga komunidad na dumaranas ng matinding pinsala at pangangailangan.

“Kaming mga public servant, kaming mga hinahalal ng taumbayan ay dapat nakikita na hindi naglalaro, na kung anu-anong ginagawa, namumulitika, whatever, basta’t nagtatrabaho lang para makapagserbisyo sa tao,” ani Marcos.

Dagdag pa ng Pangulo, ang tunay na sukatan ng pamumuno ay nakikita sa aksiyon at malasakit, hindi sa mga salita o pangakong walang kasunod. Kaya’t nanawagan siya sa lahat ng opisyal ng pamahalaan, mula lokal hanggang pambansa, na ituon ang lahat ng kanilang lakas at atensyon sa pagbangon ng mga komunidad at sa pagbibigay ng agarang tulong sa mga naapektuhan.

Sa kasalukuyan, nagpapatuloy ang relief operations at assessment ng pinsala sa Masbate. Katuwang ng pambansang pamahalaan ang mga lokal na opisyal at volunteer groups sa paghahatid ng pagkain, tubig, at iba pang pangunahing pangangailangan.

Ang panawagan ni Marcos ay nagsilbing paalala na ang tunay na serbisyo publiko ay hindi tungkol sa kapangyarihan o posisyon, kundi sa paglilingkod sa kapakanan ng bawat Pilipino, lalo na sa oras ng sakuna. (Larawan: Bongbong Marcos / Facebook)