CEBU — Sa gitna ng matinding epekto ng 6.9-magnitude na lindol na yumanig sa Cebu nitong Setyembre 30, nagpakita ng matinding sakripisyo at pagkakapit-bisig ang mga residente ng Barangay Canagahan, Purok Buongon, Sitio Toong sa San Remigio.

Dahil sa kakulangan ng suplay ng malinis na inuming tubig, napilitan ang mga residente na ipagpalit ang kanilang inaning kamote at saging kapalit ng tubig na ligtas inumin. Ang hakbang na ito ay nagpapakita ng desperasyon at kagustuhan nilang matiyak ang kaligtasan ng kanilang pamilya sa harap ng kalamidad.

Ang San Remigio ay kabilang sa mga bayan na pinakamalubhang naapektuhan ng lindol, na nagdulot ng pinsala sa mga bahay, imprastraktura, at pangunahing serbisyo gaya ng tubig at kuryente. Maraming pamilyang apektado ang nananatiling umaasa sa tulong mula sa gobyerno at mga pribadong grupo.

Para sa mga residente, higit pa sa pagkain ang pangangailangan nila ngayon. Ang tubig ay naging pangunahing yaman na halos kasinghalaga ng ginto. “Kahit anong meron kami, handa naming ipagpalit, basta’t may malinis na tubig para sa mga bata,” pahayag ng isang residente.

Patuloy na nananawagan ang mga mamamayan ng San Remigio ng agarang aksyon mula sa pamahalaan at mga humanitarian groups upang matugunan ang kanilang pangunahing pangangailangan. (Larawan: Dianne Padillo / Facebook)