OKTUBRE 7, 2025 — Walang puwang ang ‘di nakaprogramang pondo sa panukalang pambansang budget para sa 2026, ayon kay Senate President Vicente “Tito” Sotto III. Kasama rin sa mga aalisin ang “urgent certification” na madalas ginagamit para mapabilis ang pagpasa ng batas.

Sa isang press briefing nitong Oktubre 6, iginiit ni Sotto na siya at si Senador Sherwin Gatchalian, chairman ng Senate finance committee, ay magtutulungan upang matiyak na ang final reading ng budget ay walang nakatagong alokasyon.

“Sen. Sherwin Gatchalian and I will ensure that when we discuss the budget on its final reading, there will be no unprogrammed funds,” ani Sotto. 

(Sisiguraduhin namin ni Sen. Sherwin Gatchalian na sa final reading ng budget, wala nang ‘di nakaprogramang pondo.)

Dagdag pa niya, ang lahat ng alokasyon ay dapat malinaw na nakasaad upang maiwasan ang mga biglaang pagbabago sa pondo matapos itong maaprubahan.

“We will put this on programmed allocations, so that it’s clear and transparent. We can avoid the act of budget realignment once the budget is already passed,” paliwanag ni Sotto. 

(Ilalagay namin ito sa nakaprogramang alokasyon para malinaw at transparent. Maiiwasan natin ang pag-realign ng budget kapag naipasa na ito.)

Kasunod ito ng utos ni Pangulong Ferdinand Marcos Jr. na huwag nang gamitin ang “certification of urgency” sa budget bill. Ang hakbang na ito ay naglalayong sundin ang itinakdang “three-day rule” sa Konstitusyon.

“The President himself said that …he no longer likes a shortcut on the three-day rule. So it’s like that. I’m sure it will also be applied in the Senate,” sabi ni Sotto. 

(Mismong ang Pangulo ang nagsabi … ayaw na niya ng shortcut sa three-day rule. Kaya ganoon na nga. Sigurado akong ipapatupad din ito sa Senado.)

Ayon kay Sotto, mas makabubuti ito sa mga mambabatas dahil magkakaroon sila ng sapat na oras upang basahin at suriin ang nilalaman ng budget bago ito tuluyang aprubahan.

(Larawan: Vicente Tito Sotto | Facebook)