SAGAY CITY, Negros Occidental — Naaresto ng mga awtoridad ang isang 63-anyos na senior citizen na kabilang sa mga most wanted persons sa Negros Island Region matapos masangkot sa serye ng panggagahasa sa isang menor de edad.

Ayon sa ulat ng Police Regional Office–Negros Island Region (PRO-NIR), kinilala ang suspek sa alyas na “Mar”, residente ng Barangay Lacaron, Valladolid, ngunit pansamantalang naninirahan sa Barangay Makiling, Sagay City. 

Inaresto siya ng mga operatiba ng Valladolid Municipal Police sa bisa ng warrant of arrest para sa 17 counts ng statutory rape at 23 counts ng acts of lasciviousness sa ilalim ng Revised Penal Code at Republic Act 7610 o ang Special Protection of Children Against Abuse, Exploitation and Discrimination Act.

Batay sa imbestigasyon, matagal nang pinaghahanap ang suspek at itinuturing na Top 1 most wanted person sa rehiyon. Ayon kay Lt. Col. Joem Malong, tagapagsalita ng PRO-NIR, ang akusado ay nagbanta pa umano sa biktima na papatayin kung isisiwalat ang pang-aabuso.

Sa hiwalay na operasyon, isa pang suspek na may kasong rape ang naaresto sa Barangay Baviera, Sagay City. Kinilala siya sa alyas na “Poloy”, 22-anyos, na kabilang din sa listahan ng mga most wanted sa rehiyon.

Binigyang-diin ni PBrig. Gen. Arnold Thomas Ibay, regional director ng PRO-NIR, na ang pagkakaaresto sa mga suspek ay bahagi ng pinaigting na kampanya laban sa mga kriminal na matagal nang nakatakas sa batas. “This is a clear message that fugitives cannot hide forever. Justice will eventually catch up with them,” aniya.

Ang mga suspek ay kasalukuyang nasa kustodiya ng pulisya at nakatakdang harapin ang mga kasong kriminal sa korte. Ang insidente ay muling nagbigay-diin sa pangangailangan ng mas mahigpit na proteksyon para sa mga kabataan laban sa pang-aabuso at karahasan.