MANILA — Naglabas ng opisyal na pahayag ang Department of Foreign Affairs (DFA) kaugnay ng insidente sa Gardermoen Airport sa Oslo, Norway, kung saan hindi nakapagpalit ng US dollars ang Filipinong turista na si Gretchen Ho sa foreign exchange stall ng paliparan.

Ayon sa DFA, ang naturang stall ay sumusunod sa updated list ng Financial Action Task Force (FATF) — isang pandaigdigang organisasyon na nagmo-monitor sa mga bansa hinggil sa anti-money laundering (AML) at counter-terrorism financing (CTF) measures. Sa listahang ito, ang mga bansang may kakulangan sa mga nasabing patakaran ay maaaring hindi tanggapin sa ilang financial transactions.

Nilinaw ng DFA na ang Pilipinas ay opisyal nang tinanggal sa FATF grey list noong Pebrero 2023, at sa European Union (EU) grey list noong Marso 2023. Dahil dito, hindi na dapat ituring ang Pilipinas bilang high-risk sa mga transaksyong pinansyal.

“The Philippines has made significant strides in strengthening its financial system and its commitment to combating financial crimes,” ayon sa pahayag ng DFA.

Dagdag pa ng ahensya, nakikipag-ugnayan na sila sa Financial Supervisory Authority of Norway upang ma-update ang listahan ng mga bansang kinikilala ng foreign exchange stalls sa Oslo, at upang maiwasan ang mga ganitong insidente sa hinaharap.

Ang DFA ay nanawagan sa mga ahensyang pinansyal sa ibang bansa na kilalanin ang mga repormang ipinatupad ng Pilipinas, at iginiit ang kahalagahan ng tamang impormasyon sa mga frontline financial services upang hindi maapektuhan ang mga Pilipinong biyahero.

Ang insidente ay umani ng atensyon sa social media matapos ibahagi ni Gretchen Ho ang kanyang karanasan, na nagbunsod ng diskusyon ukol sa reputasyon ng Pilipinas sa pandaigdigang sistema ng pananalapi.