MANILA — Inihayag ng Independent Commission for Infrastructure (ICI) na nakatakda nitong magsampa ng mahigit 15 kaso sa loob ng apat na linggo laban sa mga indibidwal na sangkot sa 421 umano’y ghost o substandard flood control projects ng Department of Public Works and Highways (DPWH).

Ayon kay ICI special adviser at dating Philippine National Police (PNP) chief Rodolfo Azurin Jr., ang mga kasong ihahain ay resulta ng masusing imbestigasyon sa 8,000 flood control projects na isinailalim sa validation ng DPWH, Armed Forces of the Philippines (AFP), PNP, at Department of Development (DepDev). “Between now and the third to fourth week, we are looking to file at least 15 cases,” pahayag ni Azurin sa isang press conference matapos ang kanyang panunumpa bilang bagong miyembro ng komisyon.

Dagdag pa ni Azurin, ang proseso ay kinabibilangan ng technical validation, case buildup, at pagsasampa ng kaso sa Office of the Ombudsman. “The filing of cases will happen as soon as documentation is complete,” aniya.

Ang ICI ay itinatag upang magsagawa ng malawakang imbestigasyon sa mga iregularidad sa mga infrastructure programs ng pamahalaan. Pinalitan ni Azurin si Baguio City Mayor Benjamin Magalong bilang miyembro ng komisyon.

Ayon sa ulat ng The Manila Times, kabilang sa mga proyektong iniimbestigahan ay mga flood control works na walang pisikal na ebidensiya, kulang sa dokumentasyon, o may anomalya sa implementasyon. Inaasahan na magpapatuloy pa ang validation sa natitirang mga proyekto sa mga susunod na buwan.