OKTUBRE 15, 2025 — Ipinatutupad na ang dalawang buwang price freeze sa lalawigan matapos ang sunod-sunod na lindol na yumanig sa rehiyon noong Oktubre 10.

Ayon sa Department of Trade and Industry (DTI), epektibo ang price freeze mula Oktubre 13 hanggang Disyembre 12, 2025, alinsunod sa Price Act. Sakop nito ang mga pangunahing bilihin gaya ng bigas, mais, karne, isda, gulay, de-lata, instant noodles, gatas, at sabon.

Ang hakbang ay awtomatikong ipinatupad matapos ideklara ng Sangguniang Panlalawigan ang state of calamity sa buong probinsya bunsod ng magnitude 7.6 at 6.8 na lindol.

Layunin ng price freeze na pigilan ang pagtaas ng presyo ng mga pangunahing pangangailangan habang nasa ilalim ng krisis ang lalawigan. 

Ayon sa DTI, “This measure ensures that the prices of basic necessities remain stable and accessible to consumers during the period of rehabilitation.” 

(Tinitiyak ng hakbang na ito na mananatiling matatag at abot-kaya ang presyo ng mga pangunahing bilihin habang nasa yugto ng rehabilitasyon.)

Samantala, naglabas din ng abiso ang Department of Energy (DOE) tungkol sa pansamantalang price freeze sa household LPG (11 kilo at pababa) at kerosene. Epektibo ito sa loob ng 15 araw mula nang ideklara ang state of calamity.

Pinaalalahanan ng mga ahensya ang mga negosyante na mahigpit na ipinagbabawal ang pagtaas ng presyo sa mga sakop na produkto sa panahon ng price freeze. Ang sinumang lalabag ay maaaring maharap sa kaukulang parusa sa ilalim ng batas.

Patuloy ang monitoring ng DTI at DOE sa mga pamilihan upang matiyak ang pagsunod ng mga establisyemento. Hinihikayat din ang publiko na i-report ang anumang pag-abuso sa presyo sa mga tanggapan ng ahensya.

(Larawan: DTI Davao Oriental | Facebook)