OKTUBRE 17, 2025 — Humiling ang National Bureau of Investigation (NBI) sa Interpol na maglabas ng red notice laban kay Royina Garma, dating general manager ng Philippine Charity Sweepstakes Office (PCSO) at retiradong pulis, kaugnay sa kasong pagpatay kay Wesley Barayuga noong 2020.

Ang red notice ay isang pandaigdigang abiso para sa pansamantalang pag-aresto ng isang indibidwal habang hinihintay ang extradition o pagsuko sa mga awtoridad.

Kinumpirma ni NBI Director Jaime Santiago na naisumite na ang kahilingan matapos aprubahan ng Mandaluyong Regional Trial Court Branch 279 ang mosyon ng prosekusyon na kanselahin ang pasaporte ni Garma at ng apat pang akusado. Kabilang sa mga ito sina Edilberto Leonardo, Santie Mendoza, Nelson Mariano, at Jeremy Causapin — pawang mga dating miyembro ng pulisya.

Nahaharap sila sa mga kasong murder at frustrated murder kaugnay sa pagkamatay ni Barayuga, dating board secretary ng PCSO, at sa pagkakasugat ng kanyang driver na si Jun Gunao.

Dalawa sa mga akusado — sina Mendoza at Mariano — ay sumuko na sa NBI. Si Garma naman ay huling namataan sa Malaysia matapos tanggihan ang kanyang asylum application sa Estados Unidos. 

Ayon sa ulat, nakipagpulong siya roon sa mga kinatawan ng International Criminal Court (ICC) bilang posibleng testigo laban kay dating Pangulong Rodrigo Duterte, na kasalukuyang nakakulong sa The Hague, Netherlands.

Inatasan din ng korte ang Department of Foreign Affairs na kanselahin ang mga pasaporte ng lahat ng akusado at ipinag-utos sa Bureau of Immigration na huwag silang payagang makaalis ng bansa nang walang pahintulot ng hukuman.

Ayon kay DOJ Prosecutor General Richard Anthony Fadullon, “If the issuance of a red notice, Garma’s movements would be restricted and will help in bringing her back to the Philippines.” 

(Kung maipapalabas ang red notice, malilimitahan ang kilos ni Garma at makatutulong ito sa pagbabalik niya sa Pilipinas.)

(Larawan: Wikipedia)