MANILA — Bilang hakbang ng transparency at pananagutan, isinapubliko ng mga kongresistang kasapi ng Makabayan bloc ang kanilang Statement of Assets, Liabilities, and Net Worth (SALN) nitong Oktubre 17, 2025. Kasabay nito, hinamon nila sina Pangulong Ferdinand Marcos Jr., Pangalawang Pangulo Sara Duterte, at iba pang halal at itinalagang opisyal ng pamahalaan na gawin din ang parehong hakbang.

“As it has done numerous times in the past, members of the Makabayan bloc released their statement of assets, liabilities and net worth (SALN) in the spirit of transparency and accountability,” ayon sa opisyal na pahayag ng mga mambabatas.

Kabilang sa mga nagsapubliko ng SALN sina ACT Teachers Partylist Rep. Antonio Tinio, Kabataan Partylist Rep. Renee Co, at Gabriela Women’s Party Rep. Sarah Elago. Batay sa kanilang mga dokumento, tinatayang may net worth na ₱10.9 milyon si Tinio, mahigit ₱1 milyon si Elago, at ₱280,000 si Co.

Nagpahayag din si Kamanggagawa Partylist Rep. Eli San Fernando ng intensyong magsumite ng SALN sa pamamagitan ng liham sa House Secretary General.

Samantala, sinabi ni Pangulong Marcos na bukas siyang isapubliko ang kanyang SALN, ngunit nais niyang sundin ang mga dating patakaran. “We’ll follow the old rules. These old rules were suspended in the last administration, where the SALN was – it was much easier to get a copy of the SALN and to examine it,” ani Marcos.

Matatandaang inalis na ng Office of the Ombudsman ang dating restriksyon sa pag-access ng SALN ng mga opisyal ng gobyerno, ayon sa isang memo mula kay Ombudsman Jesus Crispin Remulla.

Larawan mula sa Makabayn Bloc