MANILA — Kinumpirma ng Philippine Army na tinanggal si Cavite 4th District Representative Francisco “Kiko” Barzaga Jr. mula sa hanay ng Armed Forces of the Philippines (AFP) Reserve Force, matapos ang masusing pagsusuri sa umano’y paglabag sa mga regulasyong militar.

Ayon kay Army spokesperson Col. Louie Dema-ala, naging epektibo ang “delistment” ni Barzaga noong Setyembre 21, 2025, alinsunod sa General Headquarters, AFP Standard Operating Procedure No. 7. “While we regret the necessity of this action, the Philippine Army upholds the integrity of its ranks and the sanctity of its uniform,” pahayag ni Dema-ala sa mga mamamahayag.

Dahil sa desisyong ito, nawalan na ng lahat ng pribilehiyo si Barzaga bilang reservist at hindi na siya pinahihintulutang magsuot ng uniporme ng militar sa anumang pagkakataon. Bukod pa rito, pinagbawalan na rin siyang maitalaga sa regular o reserve ranks ng AFP sa hinaharap.

Tinukoy ng Army ang paglabag sa Articles 177 at 179 ng Revised Penal Code bilang batayan ng pagtanggal. Ang Article 177 ay tumutukoy sa “Usurpation of Authority or Official Functions,” habang ang Article 179 ay kaugnay ng “Illegal Use of Uniforms and Insignias”.

Ang hakbang ng Army ay kasunod ng mga ulat na si Barzaga ay nanawagan sa mga sundalo at reservists na sumama sa anti-corruption protest noong Setyembre 21, isang kilos-protesta na may kaugnayan sa mga anomalya sa flood control projects ng Department of Public Works and Highways (DPWH).

Bagama’t hindi pa nagbibigay ng pahayag si Barzaga ukol sa kanyang pagkakatanggal, nananatiling mainit ang isyu sa gitna ng mga imbestigasyon sa korapsyon sa pamahalaan. Patuloy ang pagbusisi ng Office of the Ombudsman at ng Senate Blue Ribbon Committee sa mga flood control projects na sinasabing may ghost at substandard components.

Ang AFP Reserve Force ay binubuo ng mga sibilyan at dating sundalo na maaaring ma-deploy sa panahon ng emerhensiya o digmaan. Mahigpit ang regulasyon sa pagsusuot ng uniporme at pagganap ng tungkulin, kahit sa mga miyembrong halal sa posisyon sa gobyerno.