Nobyembre 22, 2025 -  Isang menor de edad na estudyante ng Fort San Pedro National High School sa Iloilo City ang umamin na siya ang nagpakalat ng bomb threat na nagdulot ng suspensyon ng klase noong Nobyembre 19. 

Ayon sa ulat ng Iloilo City Police Station 1, ang 16-anyos na estudyante ay kusang sumama sa kanyang lola upang magtungo sa himpilan ng pulisya noong Nobyembre 21 at inamin ang kanyang ginawa.

Batay sa imbestigasyon, isang guro ang nakatanggap ng mensahe ng bomb threat noong gabi ng Nobyembre 18 mula sa isang babaeng estudyante. Kalaunan ay natukoy na ang mismong nagpakalat ng mensahe ay ang 16-anyos na kaklase ng naturang estudyante. 

“Ang sagot niya sa Women and Children Protection Desk, na-bored lang daw siya,” ayon kay Police Captain Melchor Tolentino, hepe ng Iloilo City Police Station 1.

Dahil sa banta, agad na nagsuspinde ng klase ang pamunuan ng Fort San Pedro National High School noong Nobyembre 19 bilang pag-iingat. Ang insidente ay naganap sa gitna ng serye ng mga bomb threat na tumama sa halos isang dosenang paaralan sa Iloilo City at probinsya mula Nobyembre 12 hanggang Nobyembre 19. Kabilang dito ang University of San Agustin at West Visayas State University na parehong nakatanggap ng mga pekeng banta sa pamamagitan ng social media.

Nilinaw ng mga awtoridad na ang naturang 16-anyos na estudyante ay hindi konektado sa iba pang bomb threats na nagdulot ng takot at pagkalito sa mga paaralan sa Iloilo. Ayon sa Philippine News Agency, wala pang konkretong ebidensya na nag-uugnay sa kanya sa mas malawak na serye ng mga insidente.

Samantala, ipinatawag ni Iloilo City Mayor Raisa Treñas ang mga administrador ng mga paaralan at mall sa lungsod upang palakasin ang seguridad. Nagbigay siya ng rekomendasyon para sa mas mahigpit na protocol laban sa mga bomb threat, kabilang ang masusing pag-monitor sa mga online platforms na ginagamit sa pagpapadala ng mga pekeng banta.

Patuloy ang imbestigasyon ng pulisya at ng Women and Children Protection Desk upang matukoy ang posibleng pananagutan ng menor de edad. Bagamat hindi siya maaaring kasuhan bilang adulto, maaaring isailalim siya sa mga programang rehabilitasyon at counseling alinsunod sa Juvenile Justice and Welfare Act.