MANILA, Philippines — Humarap ngayong araw si Quezon 3rd District Representative Reynante Arrogancia sa Independent Commission for Infrastructure (ICI) upang personal na magbigay-linaw kaugnay ng mga alegasyon sa mga proyekto ng flood control sa kanyang distrito. Sa pagdinig, binigyang-diin ng kongresista ang kanyang buong kooperasyon at iginiit na handa siyang sumailalim sa anumang pagsusuri upang maprotektahan ang pondo ng bayan.

Ayon kay Arrogancia, mahalagang tiyakin na ang lahat ng proyekto sa imprastruktura ay transparent at nakatuon sa kapakanan ng publiko, lalo na’t ang mga flood control projects ay may direktang epekto sa kaligtasan at kabuhayan ng mga residente. Dagdag pa niya, bukas siya sa pagbusisi ng mga dokumento at proseso upang maipakita na tapat ang kanyang paggampan bilang halal na opisyal. Patuloy naman ang ginagawa ng ICI sa pag-imbestiga sa mga umano’y iregularidad sa iba’t ibang proyekto sa imprastruktura sa buong bansa. Layunin nitong mapalakas ang pananagutan at masawata ang katiwalian sa paggamit ng pondo ng gobyerno.

Sa pagpapakita ni Cong. Arrogancia ng kahandaang makipagtulungan, inaasahang magiging mas malinaw ang proseso ng imbestigasyon at magbibigay-daan ito sa mas mahigpit na pagpapatupad ng transparency sa mga proyekto ng pamahalaan. (Larawan: Bondoc Peninsula / Facebook)