OKTUBRE 7, 2025 — Bumaba sa 31 buwan ang tinatayang panahon para maubos ang sobrang supply ng mga condominium unit sa Metro Manila, ayon sa pinakabagong ulat ng Leechiu Property Consultants (LPC). Mas maikli ito kumpara sa 38 buwan noong nakaraang quarter, dulot ng mas mataas na demand at mas kaunting bagong proyekto.

Sa ikatlong quarter ng taon, may 79,400 units na binebenta mula sa 619 gusali sa Metro Manila. Tumaas ng 16% ang bentahan kumpara sa nakaraang quarter, na umabot sa 7,713 units. Samantala, halos hindi gumalaw ang bilang ng mga bagong launch —1,766 lang, na tumaas ng 0.3%.

Pinakamalakas ang bentahan sa segment ng upscale market (P7M–P12M) na may 2,855 units. Sumunod ang upper middle (P4M–P7M) na may 2,316 units, high-end (P12M–P68M) na may 1,942 units, at middle income (P2.3M–P4M) na may 394 units. Kaunti lang ang nabenta sa luxury segment (P68M pataas).

Sa kabuuang inventory, 34% ay nasa upscale segment, 32% sa upper middle, 18% sa high-end, 9% sa middle income, 5% sa lower middle, 1% sa luxury, at wala pang 1% sa low income.

Bagama’t bumibilis ang galaw ng merkado, nananatiling hamon ang affordability. 

Ayon kay LPC Research Director Joey Golez, “But while the market is moving in the right direction, the reality is that most of the available inventory remains out of reach for the average Filipino household.” 

(Ngunit habang gumaganda ang takbo ng merkado, ang katotohanan ay nananatiling hindi abot-kaya ng karaniwang Pilipino ang karamihan sa mga unit.)

Dagdag pa niya, “Addressing this affordability gap is essential if we want to invite broader participation and ensure inclusive growth in the residential sector.” 

(Mahalagang tugunan ang kakulangan sa affordability kung nais nating palawakin ang partisipasyon at masiguro ang inklusibong pag-unlad sa sektor ng pabahay.)

Pinakamalaking bilang ng unit ay nasa Quezon City (19,100), kasunod ang Ortigas (14,000), Bay Area (13,300), Maynila (10,700), Caloocan (8,800), Alabang (7,500), Makati (3,800), at BGC-Taguig (2,100).

(Larawan: Philippine News Agency)