Setyembre 23, 2025 – Humingi ng paumanhin ang Kapuso ex-PBB housemate na si Shuvee Etrata matapos muling lumutang sa social media ang kanyang mga lumang pahayag hinggil sa politika, na nagdulot ng iba't ibang reaksyon mula sa netizens.

Sa isang post sa kanyang Instagram account, inamin ni Etrata ang kanyang pagkukulang at humingi ng tawad sa lahat ng na-disappoint at nasaktan ng kanyang mga dating sinabi. “Pasensya na po sa lahat ng na-disappoint at nasaktan ko. I understand that what I said in the past caused hurt to some and I take responsibility for it,” ani Etrata.

Dagdag pa niya, tiniyak niya sa kanyang mga tagasubaybay na natuto siya mula sa karanasang ito at handa siyang mas lalong pag-isipan ang kanyang mga aksyon at pahayag para sa kapakanan ng nakararami. “Huwag po kayong mag alala, natuto na po ako. Lalawakan ko pa po ang pag-lisip ko para sa ating lahat. Mahal ko po kayo at mahal ko ang Pilipinas lalo na sa panahon ngayon. I stand for and with the Filipino people—always,” ani Etrata.

Ayon sa ilang netizens, ang mga lumang posts ng aktres ay nagpakita ng kanyang mga opinyon na may kaugnayan sa politika na kalaunan ay tiningnan ng ilan bilang kontrobersyal o hindi sensitibo. Bagama’t may mga kritisismo, marami rin ang nagbigay ng suporta sa kanya at tinanggap ang kanyang paumanhin.

Sa ngayon, nananatiling aktibo si Shuvee sa social media at patuloy na nakikipag-ugnayan sa kanyang mga tagahanga, na ipinapakita ang kanyang hangarin na mas maging responsable sa pagbibigay ng opinyon, lalo na sa mga sensitibong isyu.

Larawan: shuveeetrata/Instagram