ISABEL, Marso 21, 2025 — Inanunsyo ng National Police Commission (NAPOLCOM) nitong Biyernes na si Patrolman Francis Steve Fontillas, na naging viral dahil sa kanyang social media posts kaugnay ng pag-aresto kay dating Pangulong Rodrigo Duterte, ay bumalik na sa trabaho.

Sa isang pahayag, kinumpirma ni NAPOLCOM Commissioner Rafael Vicente R. Calinisan na nag-report si Fontillas sa Quezon City Police District (QCPD) noong March 20, 2025. “Pat. Fontillas reported to the QCPD yesterday, March 20, 2025. He was crying and extremely apologetic. Fontillas also promised not to post seditious comments and hate speech on his social media pages (Pat. Fontillas nag-report sa QCPD kahapon, March 20, 2025. Umiiyak siya at labis na humihingi ng tawad. Nangako rin si Fontillas na hindi na siya magpo-post ng sedisyosong komento at hate speech sa kanyang social media pages),” ani Calinisan.

Sa kasalukuyan, sumasailalim si Fontillas sa proseso at ilalagay sa restrictive custody. Bagamat sinabi niyang haharapin niya ang mga kasong kriminal at administratibo laban sa kanya, sinabi ni Calinisan na hindi pa nagsusumite si Fontillas ng responsive pleading.

Patuloy na itutuloy ng NAPOLCOM at Philippine National Police (PNP) ang mga kaso laban kay Fontillas. Kaugnay ng mga reklamong administratibo para sa grave misconduct at conduct unbecoming of a police officer, binigyang-diin ni Calinisan na ang Komisyon ay “resolve it with judicious dispatch as his fitness to remain in the police service is what is at stake (isaayos ito nang may maingat na pagsusuri dahil ang kanyang kakayahang manatili sa serbisyo ng pulisya ang nakataya).”

“We assure the Filipino People that Pat. Fontillas is not a representation of the 225,000 strong police force (Tinitiyak namin sa mga Pilipino na si Pat. Fontillas ay hindi sumasalamin sa 225,000 na matatag at dedikadong miyembro ng kapulisan),” dagdag ni Calinisan. Sinabi rin niya na rerepasuhin ng NAPOLCOM ang recruitment process at neuropsychiatric evaluations ng PNP upang mapabuti ang pagtukoy sa mga posibleng isyu.

Iniulat ng QCPD na sumailalim si Fontillas sa mental health treatment noong 2023 ngunit tumanggi na sa karagdagang follow-up care.

Sa isang Facebook post, sinabi ni Fontillas na pinatawad siya ng PNP at nananatili siyang bahagi ng kapulisan. “Sa kabila ng paggimbal ko sa organisasyon at sa gobyerno, pinatawad pa rin ako ng PNP. Isa pa rin akong pulis ng Pilipinas,” isinulat niya, habang nagpapasalamat sa PNP at QCPD sa pag-unawa sa kanyang mga hinaing.

Kinumpirma ng PNP na nagsampa ang QCPD ng inciting to sedition complaint laban kay Fontillas. “This development follows Fontillas’ unauthorized and politically charged social media posts in response to reports of former President's arrest (Ang pangyayaring ito ay resulta ng hindi awtorisado at politikal na sensitibong social media posts ni Fontillas kaugnay ng mga ulat sa pag-aresto sa dating Pangulo),” ayon sa PNP.

Si Fontillas, na naitalaga sa District Personnel and Holding Admin Section noong February 20, 2025, ay AWOL mula noong March 6.

Larawan: Solid President Rodrigo Roa Duterte, Sebastian, Paolo, Vp Sara/Facebook