Abril 2, 2025 – Nagpahayag ng pag-aalala ang Department of Health (DOH) tungkol sa posibilidad ng dengue outbreak sa bansa ngayong taon, kasunod ng malaking pagtaas ng mga kaso kumpara noong 2024.

Kinumpirma ni Health Secretary Ted Herbosa na umabot na sa 76,425 ang kaso ng dengue mula Enero 1 hanggang Marso 15, 2025—malayo sa 42,822 kaso sa parehong panahon noong nakaraang taon. "Tumaas ang ating dengue [cases] by over 75% kumpara sa last year and because of this, ine-expect ko na ito siguro ‘yung taon," pahayag ni Herbosa sa isang panayam.

Ayon sa DOH, karaniwang nangyayari ang dengue outbreaks kada tatlo hanggang limang taon, at ang huling major outbreak ay naiulat noong 2019. "We are expecting a big outbreak, and it’s most likely to happen this year," dagdag pa ni Herbosa.

Pinakamarami ang naitalang kaso sa mga rehiyon ng Calabarzon (15,108 kaso), National Capital Region (13,761 kaso), at Central Luzon (12,424 kaso). Bagaman may pagtaas sa bilang, nananatiling mababa ang case fatality rate sa 0.41%.

Bilang tugon, inilunsad ng DOH ang isang nationwide campaign upang pigilan at kontrolin ang pagkalat ng mga lamok na may dalang dengue virus. Patuloy nilang hinihimok ang publiko na linisin ang mga lugar na maaaring pamugaran ng lamok at agad magpakonsulta kapag may naramdamang sintomas.

Kabilang sa karaniwang sintomas ng dengue ang mataas na lagnat, matinding sakit ng ulo, pananakit ng kalamnan at kasukasuan, pagduduwal, at mga pantal sa balat. Sa mga malalang kaso, kinakailangan ng pagpapa-ospital, at pinapayuhan ng DOH ang agarang konsultasyon kung may tuloy-tuloy na sintomas.

Nananatiling nakaalerto ang pamahalaan habang papalapit ang panahon ng pinakamataas na transmisyon ng dengue sa bansa.