April 5, 2025 — Opisyal nang isinailalim ng Commission on Elections (COMELEC) sa kanilang kontrol ang bayan ng Datu Odin Sinsuat, Maguindanao del Norte, bilang paghahanda sa halalan sa Mayo 12, 2025.

Inilabas ng ahensya ang desisyong ito matapos ang pagpatay sa election officer na si Atty. Bai Maceda Lidasan Abo at sa kanyang asawa na si Jojo Abo noong Marso 26, 2025 sa Barangay Makir.

Ipinahayag ni COMELEC Chairman George Erwin Garcia ang resolusyon sa isang press conference. “The declaration is effective today, and therefore the resolution is effective today. However, no substantial changes will happen in Datu Odin Sinsuat. We want life to remain as normal as possible for the residents,” aniya.

Binigyang-diin ni Garcia na layunin ng hakbang na ito na tiyakin ang kapayapaan at kaayusan sa nasabing bayan. “The powers of the COMELEC are unlimited just to ensure that there will be peace and order in the entire area under COMELEC control,” sabi niya.

Nilinaw niyang may kapangyarihan ang COMELEC na pangasiwaan ang lokal na pamahalaan, ngunit hindi nila balak gamitin ito maliban na lang kung kinakailangan.

Nag-udyok ng pangamba sa election-related violence sa rehiyon ang pananambang kina Atty. Abo at sa kanyang asawa. Tiniyak ni Garcia na magpapatupad sila ng karagdagang seguridad, kabilang ang mas maraming presensya ng pulis at militar. “Expect an increase in military and police presence,” dagdag niya, at sinabing bibigyan din ng security detail ang mga lokal na election official.

Sa kabila ng mas mahigpit na seguridad, pinanatag ni Garcia ang mga residente na hindi maaapektuhan ang kanilang normal na pamumuhay. “To the people, it has nothing to do with your work and studies. Don’t worry. It will be as normal as possible,” aniya.

Binigyang-diin ng pasya ng COMELEC ang kahalagahan ng pagkakaroon ng ligtas at maayos na halalan. Ipinahayag ni Garcia ang kanyang pag-asa na hindi na mauulit ang ganitong sitwasyon. “Our request is that this will be the first and last time Datu Odin Sinsuat is declared under COMELEC control,” aniya.

Nananatiling nakatuon ang COMELEC sa pagprotekta sa demokratikong proseso at sa karapatan ng mga botante sa Datu Odin Sinsuat at sa iba pang bahagi ng bansa.

Image courtesy of Municipality of Datu Odin Sinsuat