MANILA — Muling ibinalik sa maayos na kalagayan ang mga center island plantbox sa kahabaan ng Kalaw Street, Ermita matapos itong madungisan at mabandalismo noong Linggo sa kasagsagan ng isang rally laban sa korapsyon.

Ayon sa Department of Engineering and Public Works (DEPW), bahagi ito ng kanilang patuloy na hakbang upang ibalik sa normal ang kaayusan at kalinisan ng lungsod matapos ang kaguluhan na sumira sa ilang pampublikong lugar. Kabilang sa mga isinasaayos at muling pinipinturahan ay hindi lamang ang mga plantbox kundi maging ang mga pader at ilang establisimyento na naapektuhan ng vandalismo.

Layunin ng gawaing ito na hindi lamang maibalik ang magandang tanawin sa lungsod, kundi ipakita rin na nananatiling matatag ang pamahalaang lungsod sa pagpapanatili ng kaayusan at disiplina. Dagdag pa rito, hinikayat ng mga opisyal ang publiko na makiisa sa pangangalaga ng mga pampublikong pasilidad at huwag hayaan na masira ang mga ito sa pamamagitan ng iresponsableng gawain.

Patuloy namang nananawagan ang pamahalaan na igalang ang karapatan sa malayang pagpapahayag ngunit iwasan ang anumang pagkilos na makapipinsala sa mga ari-arian at imprastruktura ng bayan. Ang sama-samang pag-aalaga sa kalinisan at kaayusan ng Maynila ay makatutulong sa mas ligtas at maayos na pamayanan para sa lahat. (Larawan: Mayor Isko Domagoso Moreno / Facebook)