MAYNILA — Pormal nang inilunsad ng Metropolitan Manila Development Authority (MMDA) ang bagong “May Huli Ka” website, isang digital platform kung saan maaaring i-check ng mga motorista kung may traffic violations sila sa ilalim ng No Contact Apprehension Policy (NCAP).

Ipinaliwanag ni MMDA Chairman Don Artes na ligtas at maginhawa ang bagong sistema, dahil kailangan lamang ilagay ang plate number, conduction sticker number, at ang motor vehicle (MV) file number upang makita ang record ng paglabag.

Isinama ang MV file number upang matiyak ang pagsunod sa data privacy laws, kaya’t tanging ang may-ari lamang ng sasakyan ang makakakita ng kanilang violation records.

"The old May Huli Ka app just required you to type in the plate number, and it would show if there had been a violation… But the problem is, it violated data privacy laws," ayon kay Artes sa isang press conference.

Inanunsyo rin ng MMDA na may mga susunod pang update, kabilang ang isang mobile app na papayagan ang mga motorista na gumawa ng account, tingnan agad ang kanilang violations, at panoorin pa ang video ng aktwal na paglabag.

Magkakaroon din ng fleet management feature para sa mga operator ng public utility vehicles (PUVs) kung saan maaaring irehistro ang maraming sasakyan sa iisang account.

Tiniyak ni Artes na isasama rin ang real-time SMS at email notifications, pati na rin ang online contesting kung nais kuwestyunin ng motorista ang kanilang violation.

Ang NCAP ay gumagamit ng mga AI-powered CCTV camera upang awtomatikong ma-detect ang traffic violations. Muling ipinatupad ito noong Mayo 2025 matapos i-lift ng Korte Suprema ang pansamantalang restraining order. Mahigit 5,400 motorista na ang na-flag dahil sa mga paglabag mula noon.

Maaaring gamitin ang “May Huli Ka” website sa cellphone, tablet, o computer upang makita ang record at agad mabayaran ang multa. Hinihikayat ng MMDA ang mga motorista na regular na i-check ang kanilang status upang maiwasan ang parusa at mapanatili ang pagsunod sa batas trapiko.

Image from MMDA