HULYO 20, 2025 — Nag-file si Senator Robin Padilla ng panukalang batas na magbababa sa minimum age of criminal responsibility mula 15 hanggang 10 taong gulang para sa mga menor de edad na sangkot sa malulubhang krimen tulad ng pagpatay, panggagahasa, at mga kasong may kinalaman sa droga. 

Sa ilalim ng panukala, ang mga batang edad 10 hanggang 17 na mapapatunayang nagkasala ay maaaring makulong nang mahigit 12 taon, at tatanggalin na sa kanila ang kasalukuyang exemption sa pag-uusig.

Layunin ng panukala na baguhin ang Juvenile Justice and Welfare Act (RA 9344), na ngayon ay nagsasaad ng rehabilitation — hindi pagkakakulong — para sa mga batang wala pang 15 taong gulang. Iginiit ni Padilla na hindi naaayon ang batas sa hustisya, lalo na’t tumataas ang bilang ng krimen na sangkot ang mga bata.

“The law remains unresponsive, if not completely remiss in exacting justice, from juvenile offenses relative to heinous crime,” aniya.

(Patuloy na hindi tumutugon ang batas, kung hindi man lubusang nagkukulang, sa pagpapatupad ng hustisya para sa mga krimen ng mga menor de edad na may kinalaman sa malulubhang kaso.)

Mananatili pa ring ipapasa sa community-based programs ang mga batang wala pang 15 taong gulang na sangkot sa non-heinous crimes, habang ang mga paulit-ulit na nagkakasala na edad 15–18 ay maaaring dumaan sa masinsinang rehabilitation. Pwede ring i-suspend ng korte ang sentensya para sa mas magagaang na kaso kahit umabot na sa 18 taong gulang ang bata habang nasa proseso.

Diin ni Padilla, hindi ito tungkol sa pagpaparusa sa mga bata kundi sa pagsasara ng legal na "gap" para sa malulubhang krimen. Sinasabi niya na mas maaga ngayong nagkaka-malay ang mga bata dahil sa teknolohiya at internet, kaya mas alam nila ang kanilang ginagawa.

Nagdudulot ito ng malaking alalahanin sa pagtrato sa mga bata bilang adults sa harap ng batas. Isang 10-taong-gulang — ni hindi pa nakakalabas sa elementarya — ay maaaring makulong nang ilang dekada, isang parusang ayon sa mga kritiko ay hindi tumitingin sa ugat ng problema tulad ng kahirapan, pang-aabuso, at kapabayaan ng sistema.

Pero para sa mga sumusuporta, dapat may pananagutan kahit sa mga menor de edad na nakagawa ng kalupitan. Tanong nila, bakit dapat protektahan ng edad ang mga kayang pumutok ng baril o gumamit ng patalim?

Ang panganib ay sa isang sistemang nagtuturing sa mga batang may problema bilang mga ganap na kriminal. Ang pagkulong sa mga bata nang hindi inaayos ang mas malalim na isyu ay maaaring magpalala sa cycle ng karahasan imbes na ito’y pigilan.

(Larawan: Senate of the Philippines | X)