DAVAO CITY — Umani ng matinding batikos si Brgy. Basak, Lapu-Lapu City Captain Jasmine King Chan matapos kumalat online ang mga larawan at video na nagpapakita ng kanyang magarbo at marangyang pamumuhay, habang lubog sa baha ang ilang bahagi ng kanyang barangay.

Sa gitna ng matinding ulan at pagbaha, maraming netizens ang nagtaka kung paano nagagawang mamuhay nang marangya ni Chan — na isang halal na opisyal lamang sa barangay — samantalang ang kanyang mga nasasakupan ay hirap na hirap sa epekto ng kalamidad. Ilan sa mga litratong lumutang online ay nagpapakita umano sa kanya ng mamahaling sasakyan, designer items, at pagbiyahe sa mga high-end na lugar.

"Kapitan lang pero parang artista kung umasta," ani ng isang netizen sa comment section. May ilan ding nagtanong kung saan galing ang kanyang yaman, at kung may sapat bang transparency sa paggastos ng pondo ng barangay. Sa paningin ng ilan, hindi akma ang kanyang lifestyle sa isang public servant na dapat ay nakatuon sa paglilingkod lalo na sa panahon ng sakuna.

Gayunman, may ilang tagasuporta na nagsabing mayaman na umano si Chan bago pa siya naupo bilang kapitan, at hindi dapat agad husgahan ang kanyang pamumuhay. “May negosyo na 'yan dati pa. Hindi galing sa kaban ng bayan ang luho niya,” depensa ng isang residente.

Wala pang inilalabas na opisyal na pahayag si Kapitan Chan, ngunit hinihikayat ng ilang sektor na magsalita siya upang linawin ang isyu at ipakita ang konkretong aksyon ng kanyang tanggapan para sa mga apektado ng baha.