DISYEMBRE 8, 2025 — Tinitingnan ng Office of the Ombudsman ang pagsasampa ng kasong malversation at posibleng plunder laban kay dating senador Ramon “Bong” Revilla Jr. kaugnay ng umano’y anomalya sa proyekto ng flood control. Ang hakbang ay kasunod ng rekomendasyon ng Independent Commission for Infrastructure na kasuhan si Revilla at sampung iba pa.

Sa panayam ng ANC, sinabi ni Ombudsman Jesus Crispin Remulla na sapat ang ebidensyang nakalap laban kay Revilla matapos siyang maiugnay sa kontrobersya ng dating DPWH undersecretary Roberto Bernardo at dating district engineer Henry Alcantara. 

“Most of it will be, I think, malversation will be the predicate crime. Possible plunder … It’s something that is ongoing right now. I don’t know kung anong stage na ‘yung preliminary investigation,” ani Remulla. 

(Karamihan dito, sa tingin ko malversation ang magiging pangunahing kaso. Posibleng plunder … Patuloy pa ito ngayon. Hindi ko alam kung nasaang yugto na ang preliminary investigation.)

Ayon kay Bernardo, personal niyang dinala ang P125 milyon sa bahay ni Revilla noong Disyembre 2024. Ang pera ay nakalagay sa anim na kahon, tig-P20 milyon bawat isa, at isang paper bag na may P5 milyon. Dagdag pa niya, inutos niya sa kanyang aide na maghatid ng karagdagang P250 milyon bago magsimula ang kampanya para sa halalan sa 2025.

Bukod kay Revilla, isinama rin bilang respondent sa reklamo sa Department of Justice ang dating Ako Bicol partylist representative na si Zaldy Co, ayon kay Prosecutor General Richard Fadullon. 

Sinabi rin ni Remulla na may iba pang posibleng testigo na kanilang kinikilala para palakasin ang kaso.

Inamin ni Remulla na maaaring maapektuhan ang kanyang personal na ugnayan sa pamilya Revilla, dahil parehong mula sa Cavite ang kanilang mga angkan. 

“Our family’s political interests can suffer a bit. Hindi natin alam if it will damage us or not but mag sa-suffer ‘yung relationships. Our children know each other, they work with each other, medyo mahirap din … Ito ay trabaho ko,” pahayag niya. 

Samantala, mariing itinanggi ni Revilla ang mga paratang. 

“I have lived my life facing all challenges thrown my way. Hindi ako tumakbo, hindi ako nagtago. Hindi ako umurong noon, hindi ako uurong ngayon. At dahil ang katotohanan ay nasa aking panig, haharapin ko ito nang buong tapang at paninindigan,” aniya. 

Matatandaang minsan nang nakulong si Revilla dahil sa P10 bilyong pork barrel scam ni Janet Lim Napoles, ngunit pinawalang-sala ng Sandiganbayan. Ngayon, muling nakaharap ang dating senador sa mabigat na bintang na maaaring magdala sa kanya sa panibagong paglilitis.

(Larawan: Ramon Bong Revilla, Jr. | Facebook)