AGOSTO 22, 2025 — Iniimbestigahan ng Commission on Elections (Comelec) ang mga donasyon sa kampanya ng tatlong senador at isang lokal na kandidato sa Bulacan noong 2022, na pinaghihinalaang nagmula sa mga kontratista ng gobyerno. Ayon kay Comelec Chairman George Garcia, ang pagsisiyasat na motu proprio o kusa ng ahensya ay inaasahang magbibigay ng resulta sa loob ng dalawa hanggang tatlong linggo.

“We should not only focus on the personality who came out last week, but also on other personalities,” pahayag ni Garcia, na tumutukoy sa kontrobersya kay Senate President Francis Escudero.

(Hindi lang natin dapat tutukan ang isang personalidad na lumabas noong nakaraang linggo, kundi pati na rin sa iba pang mga personalidad.)

Nabatid na nakatanggap si Escudero ng P30 milyon mula kay Lawrence Lubiano, pangulo ng Centerways Construction and Development Inc., na kabilang sa 15 kontratistang nakuha ang 20 porsyento ng lahat ng proyektong pang-kontrol sa baha na nagkakahalaga ng P545 bilyon. Inamin ni Escudero na magkaibigan sila ni Lubiano ngunit itinanggi ang anumang pagtulong sa kumpanya para makakuha ng kontrata noong siya ay governor ng Sorsogon.

Ipinagbabawal ng Seksyon 95(c) ng Omnibus Election Code ang mga kontratista ng gobyerno na mag-abuloy sa anumang kampanyang pampulitika.

Binanggit ni Garcia ang mga potensyal na butas sa batas na nagpapakumplikado sa pagpapanagot. 

“Take note, Section 95(c) states ‘natural or juridical person’ without distinguishing [company] president or personal capacity,” giit niya.

(Pansinin, ang Seksyon 95(c) ay nagsasabing 'natural o juridical person' na walang pagtatangi kung presidente ng kumpanya o personal na kapasidad.) 

Dagdag pa niya, ang mga kandidato ay required lamang na ilista ang trabaho ng kanilang mga donor, kung kaya't maaaring isulat lamang na 'negosyante' at hindi ihayag bilang isang kontratista ng gobyerno.

Kasabay nito, inaprubahan ng House of Representatives ang isang resolusyon upang siyasatin ang multi-bilyong pisong flood control projects. Ngunit tinutulan ito ng ilang miyembro, kabilang si opposition Rep. Leila de Lima na nagsabing maaaring magkaroon ng conflict of interest.

“I take the position that it would not be prudent on the part of this House, as it might entail possible conflict of interest,” pahayag ni de Lima.

(Nananindigan ako na hindi magiging maingat sa bahaging ito ng House, dahil maaaring magdulot ito ng posibleng conflict of interest.)

Sa Senado naman, nanawagan si Senate President Pro Tempore Jinggoy Estrada na “heads must roll” matapos ibunyag ni Senador Panfilo Lacson ang umano'y korapsyon sa mga proyektong pang-kontrol sa baha. Kabilang sa pinangalanang kontratista ang Wawao Builders at Darcy and Anna Builders and Trading na umano'y nasa likod ng mga ilang proyektong hindi umano'y natanto.

Habang patuloy ang imbestigasyon, nananawagan ang mga mambabatas para sa higit na transparency at pagpapanagot upang masugpo ang katiwalian sa sistema.

(Larawan: PIA - Philippine Information Agency)