QUEZON CITY — Nagdulot ng takot at abala sa mga motorista ang pagkakasunog ng isang pampasaherong bus sa P. Tuazon Boulevard bago ang EDSA intersection bandang 6:45 ng gabi nitong Sabado, Agosto 23.

Ayon sa paunang ulat ng Metropolitan Manila Development Authority (MMDA), mabilis na kumalat ang apoy habang binabagtas ng bus ang naturang kalsada. Agad namang nakalabas ang mga pasahero bago tuluyang lamunin ng apoy ang malaking bahagi ng sasakyan.

Kaagad na rumesponde ang mga bumbero at ilang rescue units upang apulahin ang sunog at tiyakin ang kaligtasan ng mga tao sa paligid. Wala pang iniulat na nasaktan o nasawi mula sa insidente.

Nagdulot naman ito ng matinding pagsikip ng daloy ng trapiko sa paligid ng Cubao at EDSA, kaya pinayuhan ang mga motorista na umiwas pansamantala sa lugar at dumaan sa mga alternatibong ruta.

Patuloy pang iniimbestigahan ng mga awtoridad ang sanhi ng sunog habang ang bus ay itinabi na sa gilid ng kalsada matapos apulahin ang apoy.

Larawan mula sa MMDA