Cavite — Muling naging laman ng usapan ang batang kongresista na si Francisco “Kiko” Barzaga matapos siyang tawaging “nepo baby” o produkto ng political dynasty sa social media, kasabay ng kanyang mas matapang na hakbang laban kay House Speaker Martin Romualdez.

Si Barzaga, 26 anyos at kinatawan ng ika-4 na distrito ng Cavite, ay naging kilala matapos manawagan ng imbestigasyon hinggil sa umano’y iregular na flood-control allocations sa distrito ni Romualdez. Para sa kanyang mga tagasuporta, ito ay patunay ng kanyang pagiging “independent” na boses sa loob ng Kamara—isang hakbang na itinuturing na bihira sa hanay ng mga mambabatas.

Ngunit sa kabila ng kanyang imahe bilang batang lider na laban sa katiwalian, muling binabalikan ng kanyang mga kritiko ang pinagmulan ni Barzaga. Siya ay anak nina dating kongresista Elpidio “Pidi” Barzaga Jr. at incumbent Mayor Jenny Austria-Barzaga, dalawang matagal nang haligi ng politika sa Dasmariñas. Sa nakaraang halalan, muling nanalo si Jenny bilang alkalde, nakapwesto rin ang isa pa nilang anak bilang bise-alkalde, at si Kiko naman ang naupo bilang kinatawan—isang kumpletong tagumpay ng pamilya sa lokal na puwesto.

Hindi rin ligtas ang pamilya sa mga kontrobersiya. Si Pidi Barzaga ay minsang umani ng batikos matapos akusahan ng mga kritiko na ginamit ang puwesto upang gipitin ang media at pinuna rin sa kanyang papel sa mga isyung gaya ng Disbursement Acceleration Program at pagbawi ng prangkisa ng ABS-CBN. Samantala, si Mayor Jenny ay nasangkot sa mga reklamo mula sa mga magsasaka at residente kaugnay ng Lupang Ramos land dispute, kung saan iginiit ng mga lokal na grupo na mas pinapaboran ng pamahalaan ang interes ng mga developer.

Sa social media, kumalat ang mga komento at larawan na naglalarawan kay Kiko na hawak ang mamahaling bagay tulad ng iPhone, sasakyan, at pera—na ginamit ng ilan upang kuwestiyunin ang kanyang sinseridad sa laban kontra katiwalian. Sa parehong plataporma, tinatawag siyang “DDS” at “nepo baby” ng ilang kritiko, habang pinupuri naman siya ng kanyang mga tagasuporta bilang matapang na bagong boses ng kabataan sa Kongreso.

Sa kasalukuyan, nananatiling tahimik si Barzaga hinggil sa mga batikos laban sa kanya at sa kanyang pamilya. Patuloy namang pinagdedebatehan ng publiko kung ang kanyang mga kilos laban sa pamunuan ng Kamara ay tanda ng tunay na reporma, o bahagi lamang ng mas malaking taktika upang palakasin ang impluwensya ng kanilang political clan.

Larawan mulsa sa Facebook