LEGAZPI CITY — Naglabas ng babala ang Philippine Atmospheric, Geophysical and Astronomical Services Administration (PAGASA) nitong Sabado ng umaga kaugnay sa inaasahang malakas na pag-ulan sa Bicol Region dulot ng isang Low Pressure Area (LPA) na nasa silangan ng Eastern Samar.

Ayon sa advisory ng PAGASA, inaasahang makakaranas ng 50–100 millimeters ng ulan ang mga lalawigan ng Camarines Norte, Camarines Sur, Catanduanes, Albay, Sorsogon, at Northern Samar ngayong araw. Bukas, inaasahan ding uulan ng parehong dami sa Quezon at Camarines Norte.

“Moreover, impacts in some areas may be worsened by significant antecedent rainfall,” babala ng PAGASA, na nangangahulugang mas malala ang epekto sa mga lugar na dati nang binaha o nabasa ng ulan sa mga nakaraang araw.

Pinayuhan ng ahensya ang mga lokal na disaster risk reduction and management offices na magsagawa ng kinakailangang hakbang upang maprotektahan ang buhay at ari-arian. Posible ang pagbaha at landslide, lalo na sa mga mabababang lugar at bulubunduking bahagi ng rehiyon.

Ang LPA ay tinatayang nasa 140 kilometro silangan ng Borongan City, Eastern Samar, at inaasahang kikilos pa-kanluran hilagang-kanluran habang tinatawid ang Visayas at Southern Luzon ngayong weekend.

Bagama’t mababa ang tsansa nitong maging tropical depression sa susunod na 24 oras, hindi inaalis ng PAGASA ang posibilidad ng pagbuo nito sa West Philippine Sea sa mga susunod na araw.

Ang susunod na advisory ay inaasahang ilalabas ng PAGASA ngayong alas-11 ng umaga. Patuloy na pinapayuhan ang publiko na mag-monitor sa opisyal na mga ulat ng ahensya para sa pinakabagong update sa lagay ng panahon.