MANILA, Philippines — Inanunsyo ng Commission on Elections (Comelec) na opisyal nang mauupo ang Gabriela Women’s Party-list bilang ika-64 na kinatawan ng mga party-list sa House of Representatives, alinsunod sa itinakda ng Konstitusyon na dapat ay bumuo ng 20 porsiyento ng kabuuang miyembro ng Kamara ang mga kinatawan mula sa party-list system.

Ayon kay Comelec Chairman George Garcia, nakapagsumite na sila ng liham sa Kamara upang tanggapin ang karagdagang miyembro mula sa Gabriela, matapos lumabas sa kanilang pagsusuri na ang 63 party-list na naiproklama matapos ang halalan noong 2025 ay katumbas lamang ng 19.8% ng kabuuang kasapian ng House of Representatives.

“Kung tutuusin, dapat 20 porsiyento ang party-list representatives. Kaya’t kinakailangan na magkaroon ng ika-64 na puwesto, at base sa computation, ito ay mapupunta sa Gabriela,” pahayag ni Garcia sa panayam ng DZMM.

Dagdag pa ng Comelec, si dating kinatawan Sarah Elago, na pangunahing nominee ng Gabriela, ang maaring maupo bilang bagong miyembro ng Kamara sa pagbubukas ng susunod na sesyon.

Batay sa Artikulo VI, Seksyon 5(2) ng 1987 Constitution, malinaw na nakasaad na ang party-list representatives ay dapat bumuo ng 20% ng kabuuang bilang ng mga kinatawan, kabilang ang mga district at party-list. Sa kabila nito, lumitaw na kulang pa ng isang puwesto ang ipinroklama ng Comelec mula sa nakaraang halalan.

Noong 2025 elections, nakakuha ang Gabriela ng 256,811 boto, dahilan upang sila ang susunod na pinakamataas na kwalipikadong grupo na makakakuha ng puwesto.

Sa ngayon, hinihintay na lamang ang pormal na proklamasyon at panunumpa ng panibagong kinatawan mula sa Gabriela bago sila opisyal na makaupo sa Mababang Kapulungan.