CEBU CITY, Philippines — Isang 64-anyos na ginang ang kritikal matapos masagasaan ng multicab sa Arellano Extension, Barangay Tinago, Cebu City, madaling-araw ng Martes, Setyembre 16.

Kinilala ang biktima bilang si Elena Maglasang, residente ng Barangay Tinago, na nagtamo ng malubhang pinsala sa ulo matapos tumilapon sa kalsada dahil sa malakas na impact ng banggaan. Agad siyang isinugod sa pagamutan kung saan patuloy na inoobserbahan ang kanyang kondisyon.

Batay sa salaysay ng mga kaanak, nakasanayan na ni Maglasang na umalis ng bahay bandang alas-4:00 ng madaling-araw upang pumunta sa Carbon Public Market para mamili ng gulay na kanyang nire-resell sa komunidad. Bukod dito, naghahanda rin umano siya ng mga pagkain na ibinebenta upang makatulong sa kabuhayan ng pamilya.

Ayon sa driver ng multicab na nakilalang si “Alex,” 39-anyos, residente ng Barangay Binaliw, hindi niya napansin ang biktima dahil sa madilim at umuulang kalagayan ng kalsada. Aniya, mabagal naman siyang nagmamaneho ngunit hindi na niya naiwasan ang pagkakasalpok nang makita ang ginang at ang kanyang kariton.

Sa kabila ng aksidente, nangako ang driver na sasagutin niya ang lahat ng gastusing medikal ni Maglasang habang patuloy itong ginagamot. “Ako na ang bahala sa ospital. Hindi ko sinasadya, at sisikapin kong tumulong hanggang sa makabawi si Nanay Elena,” pahayag umano ni Alex.

Samantala, nagpapatuloy ang imbestigasyon ng mga awtoridad hinggil sa insidente. Patuloy ding nananawagan ang pamilya Maglasang ng panalangin at suporta mula sa kanilang komunidad para sa agarang paggaling ng kanilang mahal sa buhay.


(Larawan: Google)