SETYEMBRE 18, 2025 — Maagang tinapos ng transport group na Manibela ang kanilang tatlong araw na welga nitong Huwebes, matapos ang sunod-sunod na panawagan mula sa mga ahensya ng gobyerno at mga commuter na hirap sa biyahe.

Ayon kay Manibela chairperson Mar Valbuena, tinatayang nasa 160,000 tsuper ang lumahok sa unang araw ng protesta noong Miyerkules. Ngunit matapos ang pakikipagpulong sa Department of Transportation at Land Transportation Franchising and Regulatory Board (LTFRB), nagdesisyon ang grupo na itigil na ang kilos-protesta.

“Nakiusap din sila na sana itigil na natin itong protesta kasi nga aminado sila na hirap ang ating mga mananakay. Wala halos masakyan. Kaya sabi ni [LTFRB chairperson Teofilo E. Guadiz III], ‘Nakiusap ako na sana itigil na natin itong protesta. Tutal, nag-uusap naman tayo,’” pahayag ni Valbuena.

Dagdag pa niya, “Baka after lunch, pabalikin na namin lahat yung aming mga kasamahan sa biyahe.” 

Bagamat tapos na ang welga, nakatakdang sumali ang Manibela sa mga rally sa Luneta Park at Edsa Shrine sa darating na Linggo, Setyembre 21, kung saan mag-aalok sila ng libreng sakay.

Samantala, nagsagawa rin ng hiwalay na protesta ang PISTON nitong Huwebes laban sa umano’y katiwalian sa mga flood control project ng pamahalaan. Nagsimula ang pagtitipon sa E. Rodriguez Avenue, Quezon City bandang alas-7 ng umaga, at sinundan ng sabayang pagkilos sa 11 strike centers sa Metro Manila at Laguna.

Mula España, Manila, nagmartsa ang mga miyembro ng PISTON patungong Mendiola dakong 1:30 ng hapon upang ipahayag ang kanilang panawagan sa gobyerno.

(Larawan: MANIBELA | Facebook)