Setyembre 20, 2025 – Nanawagan si dating Gen. Nicolas Torre III sa sambayanang Pilipino na sama-samang ipakita ang kanilang pagkakaisa laban sa korupsiyon at panlilinlang ng mga nasa kapangyarihan. Sa kanyang inilabas na video message, iginiit ni Torre na nararamdaman na ang matinding galit at pagkadismaya ng mga tao sa patuloy na katiwalian sa bansa.

“Galit na ang tao sa korupsiyon. Sawang-sawa na rin tayo sa panlilinlang,” mariing pahayag ni Torre. Binigyang-diin niya na sa mga nakatakdang kilos-protesta, mahalagang ipakita ng mamamayan ang kanilang paninindigan ngunit sa paraang maingat, responsable, at mapayapa.

Ayon kay Torre, ang mga rally ay dapat maging patunay na handang magkaisa ang mga Pilipino para sa pagbabago, ngunit hindi ito dapat maging dahilan para mauwi sa kaguluhan. “Ang tunay na pagbabago ay hindi nagmumula sa karahasan, kundi sa pagkakaisa,” dagdag pa niya.

Kasabay nito, nagbigay rin siya ng babala na ang karahasan ay maaaring gamitin laban sa mismong layunin ng mga nagpoprotesta. Kaya’t hinimok niya ang lahat ng lalahok na manatiling disiplinado at magpokus sa mensahe ng pagkakaisa laban sa pang-aabuso at maling pamamahala.

“Bilang isang Pilipino, ako po si Gen. Nicolas Torre III, kasama n’yo laban sa korupsiyon at pang-aapi,” pagtatapos niya sa kanyang mensahe.

Samantala, inaasahan ang malawakang pagtitipon ng mga mamamayan sa iba’t ibang bahagi ng bansa bukas, kung saan isusulong nila ang panawagan para sa mas transparent, tapat, at makatarungang pamahalaan.