MANILA — Isang political analyst ang nagbabala sa publiko na huwag hayaang sakyan ng mga “madidilim na elemento” ang malawakang kilos-protesta laban sa katiwalian sa flood control projects na nakatakda sa Setyembre 21.

Ayon kay Ronald Llamas, dating political adviser ni yumaong Pangulong Benigno Aquino III, ang galit ng publiko ay nakapagdulot ng malawak na partisipasyon mula sa mga sektor na dati’y hindi nakikilahok sa pulitika—tulad ng mga zumba groups sa Cavite at Davao, at mga fun run participants sa Malolos.

Gayunman, babala niya, posibleng gamitin din ang protesta ng mga grupong may pansariling interes.

“Di ako magugulat na may pro-revolutionary forces na sasakay dito,” ani Llamas sa isang press conference sa Quezon City.

Binigyang-diin pa niya na maaaring masabotahe ang mabuting layunin ng pagkilos kung papayagang makisawsaw ang mga “masasamang damo.”

Samantala, sinabi ni Bagong Alyansang Makabayan (Bayan) chairperson Teddy Casiño na bagama’t lehitimo ang panawagan para sa pagbibitiw sa puwesto o impeachment, kailangan pa ring maging maingat ang mga nagpoprotesta upang hindi magamit sa tunggalian ng kampo nina Pangulong Ferdinand Marcos Jr. at Bise Presidente Sara Duterte.

Kaugnay nito, inamin ni Llamas na nakikita na ang epekto ng galit ng taumbayan sa mga pagbabago sa liderato ng Senado at Kamara, maging sa pagpapatupad ng mga kaso, hold departure orders, pag-freeze ng bank accounts, at pagsiwalat ng mga whistleblower.

Target naman ng mga convenor ng “Trillion Peso March” sa People Power Monument sa Quezon City ang makalikom ng 30,000 katao sa Linggo ng hapon, kasabay ng ika-53 anibersaryo ng deklarasyon ng batas militar ng dating diktador na si Ferdinand Marcos Sr.

Bukod dito, isasagawa rin ang “Bahain ang Luneta” rally sa Maynila, gayundin ang mga aktibidad ng mga grupong kaalyado ng mga Duterte sa Liwasang Bonifacio at Camp Aguinaldo. Isang prayer rally rin ang gaganapin sa Davao City, kung saan inanunsyo ni VP Duterte ang pagkatay ng 100 baka bilang bahagi ng programa.

Ang militar at pulisya ay nasa heightened alert status upang matiyak ang seguridad sa mga kilos-protesta.