SETYEMBRE 26, 2025 — Tinanggal sa serbisyo ang 68 tauhan ng Law Enforcement Service ng Land Transportation Office (LTO) matapos ang serye ng reklamo mula sa publiko tungkol sa umano’y laganap na panunuhol at pangingikil.

Kinumpirma ni LTO Assistant Secretary Vigor D. Mendoza II na sinibak niya ang mga enforcer na nakatalaga sa Central Office sa Quezon City, base sa resulta ng performance evaluation at mga sumbong mula sa mga motorista at netizens.

“This is also as part of our efforts to weed out corruption and to professionalize LTO's enforcement team,” pahayag ni Mendoza. 

(Ito ay bahagi ng aming pagsisikap na alisin ang korapsyon at gawing propesyonal ang enforcement team ng LTO.)

Ayon sa opisyal, pinagsama-sama ng ahensya ang mga reklamo mula sa social media, hotline, at mga lihim na operatiba na ipinalabas upang subukan ang integridad ng mga tauhan. Kasama sa mga tumulong sa operasyon ang ilang stakeholder mula sa transport sector.

“Enough is enough. I will not allow any abuses and wrongdoings to compromise our positive gains from the hard work and sacrifices of our LTO family,” giit ni Mendoza. 

(Tama na. Hindi ko hahayaang masira ng pang-aabuso at katiwalian ang mga positibong tagumpay mula sa pagsisikap ng LTO.)

Kabilang sa mga tagumpay ng ahensya ang pagresolba sa 11-taong backlog ng plaka, at ang paglulunsad ng online services para sa renewal ng lisensya at delivery ng plaka.

Binigyang-diin ni Mendoza na siya mismo ang tututok sa hiring process para sa mga bagong enforcer. Tanging mga kwalipikado at may integridad ang makakapasok.

“Only those who would successfully pass the interview and are found suitable and qualified shall be considered,” aniya. 

(Tanging mga makakapasa sa panayam at kuwalipikado ang isasaalang-alang.)

Dagdag pa niya, patuloy ang kampanya ng LTO para sa job security ng mga job order personnel, na aniya’y nakinabang na sa mga reporma sa nakalipas na dalawang taon.

(Larawan: PIA - Philippine Information Agency)